• Басты
  • Жыл басынан бері қазақстандықтарға 2,2 трлн-нан астам теңге зейнетақы төленді

Жыл басынан бері қазақстандықтарға 2,2 трлн-нан астам теңге зейнетақы төленді

11 Желтоқсан, 2020 10:44

2020 жылдың қаңтар - қараша айларында республикалық бюджеттен базалық зейнетақы төлеуге 706,7 млрд теңге, ынтымақты зейнетақы төлемдеріне – 1 575,3 млрд теңге бағытталған, деп хабарлады Еңбек және халықты әлеуметтік қамту министрлігінің баспасөз қызметі. 

Баспасөз қызметінің мәліметінше, 2020 жылдың қараша айында республикалық бюджеттен зейнетақы төлемдеріне 210,4 млрд теңге, оның ішінде базалық зейнетақы төлеуге – 65,3 млрд теңге, ынтымақты зейнетақы төлеуге – 145,1 млрд теңге бөлінген. 

2020 жылғы 1 желтоқсандағы жағдай бойынша зейнеткерлер саны 2 млн 229 мың адамды құрайды.

Зейнетақы төлемдерінің орташа мөлшері (оның ішінде базалық зейнетақы) 2020 жылғы 1 желтоқсандағы жағдай бойынша  94 825 теңгені құрады.

Еске салайық, 2018 жылғы 1 шілдеден бастап мемлекеттік базалық зейнетақы төлемі, оның зейнетақы жүйесіндегі тәжірибесін ескере отырып, әр алушыға жеке тағайындалады.

Бұл ретте 1998 жылғы 1 қаңтардағы жағдай бойынша ынтымақты жүйеде жұмыс істеген уақыты, сондай-ақ міндетті зейнетақы жарналары төленген кезеңдер (бұдан әрі - МЗЖ) зейнетақы жүйесіндегі еңбек өтіліне қосылады.

"Сонымен, егер зейнетақы жүйесіндегі жұмыс өтілі 10 жыл немесе одан аз болса, сондай-ақ егер мүлде жоқ болса, базалық зейнетақы ең төменгі күнкөріс деңгейінің 54%-ын құрайды, содан кейін 10 жылдан асқан әр жыл үшін оның мөлшері 2%-ға артады. Мысалы, егер сіз 20 жыл қатыссаңыз, базалық зейнетақы күнкөріс деңгейі құнының 74%-ды, 30 жыл – күнкөріс құнының 94%-ын құрайды. 33 және одан да көп жыл жұмыс өтілі болса, күнкөріс құнының 100% жоғары мөлшерінде белгіленеді", делінген хабарламада. 

Егер бір ай ішінде МЗЖ бірнеше рет Бірыңғай жинақтаушы зейнетақы қорына жасалса, жинақтаушы жүйеге қатысу мерзімі бір айды құрайды.

Осылайша, міндетті зейнетақы жарналары неғұрлым тұрақты және толық салынатын болса, зейнетақы жасына жеткенде базалық зейнетақы төлемдерінің мөлшері соғұрлым көп болады.

Өз кезегінде, жасына байланысты зейнетақы төлемдерінің мөлшері 1998 жылғы 1 қаңтардағы жұмыс өтіліне (кем дегенде 6 ай қажет) және зейнеткерлікке дейінгі кезеңде алынған орташа айлық табысқа байланысты болады.

Барлық жаңалықтар