Төтенше жағдай кезінде жалдама құнын төлемедік – Нұрсұлтан Сәкенұлы
21 Мамыр, 2020 14:18
18 мамырда төтенше жағдайдың екі айынан кейін көптеген нысандар жұмысқа кірісуге рұқсат алды. Оның ішінде ірі сауда орталықтары да бар. Дүкені сауда орталығында орналасқан кәсіпкер Нұрсұлтан Сәкенұлы ТЖ кезінде әкімшілік жалдама құнын сұратпағанын айтты, деп хабарлады Stratеgy2050.kz тілшісі.
«Менің шағын кәсібім «Еуразия» сауда орталығында орналасқан. Яғни, сауда орталығының жалға алушысымын. Автомобиль бөлшектерін саудалайтын дүкеніміз 18 мамырда сауда орталығы ашылған соң жұмысқа кірісті. Елде жарияланған 2 айлық төтенше жағдайдан кейін шағын және орта бизнес өкілдері үшін көптен күткен қуанышты жаңалық осы болды. Бұл отбасылық бизнес болғандықтан, осы уақыт аралығында басқа табыс көзі болмады. Тек, мемлекет тағайындаған 42500 әлеуметтік төлемді алдық», - деді Нұрсұлтан Сәкенұлы.
Кәсіпкердің айтуынша, сауда орталығы ашылған соң оның әкімшілігі санитарлық талаптарды сақтауға үлкен жауапкершілікпен қараған.
«Келушілердің барлығы маскамен кіруге міндетті. Орталық ашылса да, адамдар саны көп емес. Демек, әлі де адамдар қоғамдық орындарда жүруге сескенеді. Орталыққа кіреберісте антисептиктер тұр. Жалға алушыларды да әкімшілік өз дүкендерінде антисептик қоюға міндеттеді. Маска мен қолғаптардың болуын да ескертіп айтты. Әрбір бұрылыста адамдар 1,5 метр арақашықтықты сақтау қажеттігі бойынша ескерту тақтайшалары бар», - деді ол.
Нұрсұлтан Сәкенұлы атағандай, төтенше жағдайда дүкен жұмыс істемей тұрған кезде әкімшілік жалға алудың ақысын сұрамаған.
«Сауда орталығының әкімшілігі 2 ай төтенше жағдай кезінде жалдама құнын төлетпеді. Бұл шағын әрі жас бизнес үшін айтырлықтай көмек деп ойлаймын. Бұл мәселеге объективті қарау, себебі дүкендердің өздерінде табыс болмай, жұмыс тоқтап тұрған еді», - деді ол.
