• Басты
  • ШҚО-да миллионнан астам гектарға егін егіледі

ШҚО-да миллионнан астам гектарға егін егіледі

28 Сәуір, 2020 10:41
ҚР АШМ баспасөз қызметі Қазақстан аймақтарындағы көктемгі егіс жұмыстары және оны өткізу туралы ақпарат таратуды жалғастыруда. Бүгінде Оңтүстік өңірлерінен кейін Шығыс Қазақстан облысының шарулары егіс науқанына кірісті, деп хабарлады Strategy2050.kz.

Ағымдағы жылы ШҚО-да 1,3 млн гектар жерге егіс егіледі, бұл өткен жылмен салыстырғанда 6,8 мың гектарға артық. Жаздық егіс көлемі 1 млн 98 мың гектарды құрайды.

Негізінен өңірде дәнді, дәнді-бұршақты дақылдарды – 559,3 мың (жалпы алаңның 41%) және майлы дақылдар 481 мың гектарға (35,1%) егіледі.

Майлы дақылдардың үлесінде дәстүрлі күнбағыс басым, оның көлемі – 445 мың гектардан астам.

Бұдан басқа, егіс алқабының 292 мың гектарына жем-шөп егіледі.

Сондай-ақ, 19 мың гектарға картоп, 16 мың гектарға көкөніс пен бақша салынады. Бұл ШҚО-дағы барлық егіс алқабының 2,5% құрайды.

Көктемгі егіс жұмыстарына 16,6 мың трактор, 5 мыңнан астам жүк көлігі, 93 егіс кешені, 11 мыңнан астам тұқым сепкіш, соқалар мен культиваторлар жұмылдырылады. Тракторлар 98%-ға, қалған техника – 100%-ға дайын. 

Көктемгі егіс жұмыстарына 2,5 мыңнан астам ірі және орта шаруашылық жұмылдырылған. Егіс жұмыстарын жүргізу үшін Павлодар МХЗ-дан 30 мың тонна дизель отыны бөлінді. Наурыз айына 8 мың тонна, сәуір айына 9 мың тонна, мамыр айына 8 мың тонна, маусым айына 5 мың тонна белгіленді. Қала мен аудан әкімдіктерімен оларды жеткізу жөніндегі операторлар анықталды.

Ағымдағы жылы облыстық бюджеттен субсидия түрінде 5,4 млрд теңге бөлінді. Оның ішінде тұқым шаруашылығын қолдауға – 2,7 млрд теңге, минералды тыңайтқыштардың құнын арзандатуға – 1,7 млрд теңге, пестицидтерді арзандатуға – 1,4 млрд теңге.

Сонымен қатар, «Аграрлық несие корпорациясы» АҚ арқылы егіс науқанын қосымша қаржыландыру үшін фермерлерге 2,4 млрд. теңгеден астам төмен пайызды несие берілген.

Қазіргі уақытта Шығыс Қазақстан облысында егіс алқаптарын өңдеу және ылғалды жабу жұмыстары жүргізілуде. Үржар, Зайсан және Тарбағатай аудандарында қазірдің өзінде дәнді дақылдар егілді.





Барлық жаңалықтар