Сайлау учаскелерінде қоғамдық тәртіп қалай бақыланып жатыр
10 Қаңтар, 2021 11:17
Бүгін ҚР Президенті жанындағы Орталық коммуникациялар қызметінде «Сайлауда құқықтық тәртіпті қамтамасыз ету туралы» брифингі өтті. Сайлауда орын алған құқықбұзушылықтар туралы Strategy2050.kz тілшісінің материалында.
ҚР Ішкі Істер министрінің орынбасары Заппаров Арыстанғанидің айтуынша, қазіргі уақытта ешқандай құқықбұзушылық тіркелген жоқ. Сайлау учаскелеріндегі жағдай тұрақты.
«Бүгін еліміз үшін маңызды науқан өтіп жатыр. Осы науқан қарсаңында барлық өңірдегі ішкі істер органдарының жұмысы күшейтілді. Республика бойынша сайлау учаскелерінде 40 000-нан астам құқық қорғау органдарының қызметкерлері жұмыс ітеп жатыр. Оның ішінде прокурорлар да бар. Бюллетеньдер сайлау учаскелеріне апарылмай тұрып, барлық сайлау учаскелері қауіпсіздік тексеруден өтті. Полицейлердің қатысуымен барлық бюллетень сайлау учаскелеріне жеткізілді», - деді ол.
Тәртіп сақшысының ресми дерегінше, қазіргі сағатқа дейін ешқандай тәртіп бұзушылық тіркелмеген.
«Айта кету керек, Сайлау туралы Заңға сәйкес полицейлердің сайлау процессіне қатысуына, сондай-ақ дауыс беру ғимараттарында отыруына құқығы жоқ. Олар тек комиссия төрағасы шақырған жағдайда тәртіпсіздіктің жолын кесу үшін барады. Қоғамдық тәртіп бұзылған жоқ. Сайлау өту процессі ҚР Ішкі істер министрлігінің бақылауында», - деді А.Заппаров.
Естеріңізге сала кетейік, бүгін ҚР Президенті Қ.Тоқаевтың Жарлығына сәйкес ҚР Парламент Мәжілісінің депутаттары мен мәслихат депутаттарын сайлау науқаны өтіп жатыр.
