SAILAU TALKS 2021: «Сайлау науқанында жастардың азаматтық, саяси белсенділігі артты»

10 Қаңтар, 2021 12:57

Бүгін "ҚазАқпарат" халықаралық ақпараттық агенттігінің SAILAU TALKS 2021 платформасында қазақстандық сарапшылар елде өтіп жатқан Парламент сайлауының маңыздылығы мен ерекшелігі, Қазақстанның саяси реформалары мен жалпы сайлау кампаниясының ұйымдастырылуы мен өткізілуін талқыға салды, деп хабарлады Strategy2050.kz тілшісі.

Жиынға қатысқан «Team Qazaqstan» жастар қозғалысының көшбасшысы Асхат садырбай бұл сайлаудың бұрынғы сайлаулардан өзгерек екенін атап өтті. Өйткені, бұл сайлауға жастар белсенді түрде қатысып жатыр.

«Бұл сайлауда жастардың белсенділігі жоғары. Өйткені, 30 пайыз квота әйелдер мен жастарға бөлінді. Бұрын мәслихатта, парламентте жастардың үлесі қанша пайыз болғаны бәрімізге белгілі, яғни 1-2 пайызды ғана құраған еді. Осы сайлауда жастардың үлесі бірнеше пайызға артты, олардың қатарында әйелдер де бар. Жастардың сайлауға дайындық кезеңінде, сайлау науқанында азаматтық, саяси белсенділігі артты деуге толық негіз бар. Олардың сайлауға деген қызығушылығы, елде болып жатқан оқиғаларға деген белсенділігін түрлі әлеуметтік желілерден, мессенжерлерден байқап отырмыз. Расында да, бар назары елдегі саяси реформада және сайлауда», - деді жастар қозғалысының көшбасшысы.

Асхат Садырбайдың пайымынша, өз кандидатурасын ұсынған жастардың барлығы елдегі жағдайды жақсартуға, дамытуға ат салысуды көздейді.

«Шетелде білім алған, көзі ашық, білімді, шетелдік алпауыт компанияларда қызмет істейтін жастарымыз көп. Олар да өзіміздің елде де көп дүниені жақсартуға, елді дамытуға үлес қосықысы келеді. Мәселен, өз кандидатурасын ұсынған жастардың арасында кәсіпкерлер, тағы басқа салалардың үздік мамандары бар. Оларды өз ортасы, айналасындағы достары қолдау көрсетіп жатыр. Бұл жастар үшін үлкен қолдау болмақ. Жастарды қолдау мемлекет басшысының сәтті саясатының бірі деп айтуға болады», - деді ол.

Сонымен бірге, оның пікірінше, жастардың мәселесін жастар ғана түсінеді, олардың проблемасын жоғары жаққа жастар жеткізеді. Сондықтан биылғы жыл жастар үшін жемісті жыл болмақ.

Бұдан бөлек, талқыға қатысқан Қазақстан Республикасы Президентінің жанындағы Қазақстан стратегиялық зерттеулер институтының әлеуметтік-саяси зерттеулер бөлімінің басшысы Алуа Жолдыбалина биылғы сайлаудың ерекшелігіне тоқталып өтті.

«Биылғы сайлаудың бірқатар ерекшелігін атап өтуге болады. Бірінші ерекшелігі – конституцияда белгіленген мерзімде өтіп жатыр. Сонымен қатар, Қазақстанда тұңғыш рет мәслихаттарға пропорционалды жүйе бойынша өтуде. Сонымен қоса, саяси партиялардың тізімінің барлығында 30 пайыздық квота сақталған. Бұдан бөлек, қазіргі таңда бізде «парламенттік оппозиция» деген түсінік қалыптасты. Осының арқасында бізде алғаш рет парламенттің құрамында жұмыс істейтін болады», - деді ол.

Еске салайық, бүгін Қазақстанда ҚР Парламенті Мәжілісі мен мәслихат депутаттарының сайлауы өтіп жатыр.

автор: