ҚР Сыбайлас жемқорлыққа қарсы іс-қимыл агенттігінің төрағасы Алик Шпекбаев «жыл тұлғасы» атанды
2021 жылдың 5 қаңтарында өткен «Ұлы Дала Қырандары» республикалық қоғамдық бірлестігі отырысының шешімімен «ЖЫЛ ТҰЛҒАСЫ» номинациясы Қазақстан Республикасының Сыбайлас жемқорлыққа қарсы іс-қимыл агенттігінің төрағасы Алик Шпекбаевқа берілді, деп хабарлады Strategy2050.kz тілшісі «Ұлы Дала Қырандары» республикалық қоғамдық бірлестігінің баспасөз қызметіне сілтеме жасап.
2011 жылы құрылған қоғамдық бірлестіктің номинациялары мемлекет қайраткерлері мен шығармашылық интеллигенция өкілдерінің елдің мәдени және әлеуметтік-саяси өміріндегі елеулі жетістіктері үшін беріледі.
Қоғамдық бірлестіктің төрағасы, ҚР еңбек сіңірген қайраткері, жазушы Сәдібек Түгелдің ақпаратына сәйкес, А.Шпекбаев «Халық үніне құлақ асатын мемлекет» тұжырымдамасына сәйкес қала, аудан, ауылдық әкімдіктерді сервистік үлгіге толығымен көшірудегі қомақты үлесі, мемлекеттік қызметтерді цифрландыруға белсене қатысу, мемлекеттік аппараттың ашықтығы мен тұтынушыға бағдарлануын қамтамасыз етуге бағытталған республикалық «Адалдық алаңы» жобасын насихаттау, қоғам пен мемлекет арасындағы диалог алаңына айналған «Antikor Ortalygyn» ашу, сонымен қоса сыбайлас жемқорлыққа қарсы жаңа заңнамаларды іске асыру және т.б. бірқатар бастамалары үшін марапатталған.
Осыған дейін бұл номинацияға Елбасы – Тұңғыш Президент Нұрсұлтан Назарбаев, Жамбыл облысының әкімі Бердібек Сапарбаев және т.б танымал ақын-жазушылар ие болған.
Қоғамдық бірлестіктің мақсаты – халықты бірлікке, ынтымаққа шақыру, ұлттық құндылықтарды ұлықтау, жастарды патриоттық тәрбиелеу, жемқорлыққа қарсы пәрменді күрес жүргізу.
