Президент тапсырмасы үлкен көмек болды – кәсіпкер

«Қатты індет коронавирус жұмысымыздың барлығын тоқтатып, карантинге көшіп жатырмыз. Ол барлық кәсіпкерлерге қиынға соқты. Себебі, адамдар келуді қойды, пайда түсу тоқтады. Басымызда несиелеріміз бар, оны төлеу керек. Жұмысшылардың жалақысын 18-наурызға дейін төлеп, оларды карантинге жібердік. Олардың әрі қарай күнкөрісі үшін жалақы төлеу қиындау боп тұр. Себебі, адам болмаған соң, кіріс те жоқ», - деді кәсіпкер Еркін Адасбаев.

Ол айтып өткендей, Президент тарсырмасы үлкен көмек болған.

«Жұмыссыз қалған қызметкерлерге 42500 теңге көлемінде көмек көрсетіліп жатыр. Ол көмекке разымыз. Көп адамға шаққанда ол қыруар ақша болады. Біз өтінімді электронды түрде бердік. Олар бізге хабарласып, қажетті құжаттар тізімін айтты. Біз қызметкердің тізімін, қосымша құжаттарды дайындап 1 күннің ішінде тапсырдық.Сол күнде комиссия қарап, кешеден бері жұмысшылар тәртіп бойынша ақшаларын ала бастады. Індетті жеңіп, экономикамызды сақтап, көктемгі және жазды жұмыстарды атқару керек. Барлығымыз бірігіп, жеңіп шығамыз деп ойлаймын»,- деді Е.Адасбаев.

Айта кетейік, 31-наурыз күні ҚР Президенті Қ.Тоқаев барлық республикалық арналардан мәлімдеме жасаған болатын.

«Табысынан айырылған азаматтарға ең төменгі жалақы мөлшерінде қолдау көрсеттік.Енді, 42500 теңге көлеміндегі осы көмекті алатын азаматтардың санатын кеңейтуді тапсырамын.Соған орай, бұл қолдауға өзін-өзі жұмыспен қамтығандар мен ресми тіркелмей жұмыс істейтіндер де ие болады. Бұл көмек белгіленген тәртіп бойынша шын мәнінде мұқтаж адамдарға ғана беріледі. Жалпы, 3 миллионға жуық азаматымызға қолдау көрсетіледі», - деп Мемлекет басшысы Қ.Тоқаев мәлімдеген болатын.