ОСК Мәжіліс депутаттары сайлауының алдын ала қорытындысын жариялады
Қазақстан Республикасы Орталық сайлау комиссиясының партиялық тізімдер бойынша сайланатын Қазақстан Республикасы Парламенті Мәжілісі депутаттарының сайлауында дауыс берудің алдын ала қорытындылары жөнінде баспасөз мәжілісі өтті, деп хабарлады Strategy2050.kz тілшісі.
Жиында ҚР ОСК хатшысы Сәбила Мұстафина мәжіліс сайлаудың алдын ала қорытындысын жариялады. Оның мәліметінше, «Ауыл» халықтық-демократиялық патриоттық партиясы 5,29 %, «Nur Otan» партиясы 71,9 %, «ADAL» саяси партиясы 3,57 %, Қазақстанның «Ақ жол» демократиялық партиясы 10,95 % және «Қазақстанның Халық партиясы 9,1 пайыз дауыс алған.
Айта кетейік, бұған дейін бірқатар институт зерттеуін жариялады. Қоғамдық пікір институты Еxit poll нәтижесіне сәйкес, респонденттердің 5,75 %-ы «Ауыл» халықтық-демократиялық патриоттық партиясына, 71,97 %-ы «Nur Otan» партиясына, 3,07 %-ы «ADAL» саяси партиясына, 10,18 %-ы Қазақстанның «Ақ жол» демократиялық партиясына, 9,03 %-ы «Қазақстанның Халық партиясына» дауыс берген.
«Демократия институты» ғылыми-зерттеу ассоциациясының жобалар бойынша директоры Татьяна Башарина берген дерек бойынша, сауалнама алушылар 500 сайлау учаскесінде жұмыс істеді. Оның 263-і қалалық, 237-ауылдық елді мекендер. Жалпы саны 20 мың сайлаушыдан сауалнама алынған. Олар жасаған Exit poll нәтижесі бойынша, «Nur Otan» партиясы – 72,01%, «Ауыл» халықтық-демократиялық патриоттық партиясы – 4,93 %, «ADAL» саяси партиясы – 3,25%, Қазақстанның «Ақ жол» демократиялық партиясы – 10,27 %, «Қазақстанның Халық партиясы – 9,54 % дауыс берген.
"Астана зерттеу" қоғамдық қорының өкілдері берген Exit pool нәтижелері бойынша, «Nur Otan» партиясы – 73,75%, «Ауыл» халықтық-демократиялық патриоттық партиясы – 4,8 %, «ADAL» саяси партиясы – 3,15 %, Қазақстанның «Ақ жол» демократиялық партиясы – 10,13 %, «Қазақстанның Халық партиясы – 8,17 %-ы дауыс берген.
Коронавирус инфекциясының таралуына байланысты және уәкілетті органдардың ұсынымдарына сәйкес брифинг қашықтықтан өтті.
Назерке Сүйіндік
