Қоқысты сұрыптау мәдениетін қалыптастыру мәселесі талқыланды
Праймериз – 2020 қатысушыларының пікірсайыс кезеңі басталды. Нұр-Сұлтан қаласында өткен дебаттардың бірінің басты тақырыбы қатты тұрмыстық қалдықтар мен құрылыстан қалған қоқыстарға арналды, деп хабарлады Strategy2050.kz тілшісі.
Өзін-өзі ұсынушы, ҚР сыбайлас жемқорлыққа қарсы іс-қимыл агенттігінің департамент директоры Расул Медетов тұрмыстық қалдықтың қайта өңделмеуі Нұр-Сұлтан мен Алматыдағы ғана проблема емес, Қазақстанның барлық аймағындағы мәселе болып отырғанын атап өтті.
Қоқыс қалдықтарын апаратын полигондардың санын көбейтуіміз керек және барлық өңірде болуын қамтамасыз етуіміз керек. Қазақстанда жыл сайын 600 млн тонна қоқыс түзіледі. Оның 5 % ғана қайта өңделеді. Ал қалған қоқыс көміледі немесе өртеледі. Қоқыстан улы зат пен газ бөлінеді. Адамдардың созылмалы ауру, анемия, аллергия сияқты ауруларға көптеп шалдығуына бірден бір әсер етуші фактор – ол қоқыс қалдықтар. Мен қызмет бабымен Ақтөбе, Атырау қалаларында өмір сүрдім. Бұл қалаларда қоқыс маңына өмір сүретін халық ластанған ауаға тұншығады. Түрлі аурулардың көбеюі осыдан, - деді ол.
Расул Медетов қоқысқа арналған жәшіктерді пайдалануды тұрғындар біле бермейтінін, білсе де маңыздылығын ескермейтінін айтты.
Пластмасса, политэллинге бөлек жәшік, алюминий, шыны бөлек жәшік, сонымен қатар ескірген киім-көншекке бір жәшік арнау керек. Ескірген киімдерді мұқтаж отбасыларға үлестіріп, қайырымдылық жасауға болады. Сосын біз жаңа үй сатып алсақ та, оның ішін өзгертуге, 2-3 жыл сайын есік пен еденді ауыстыруға құмармыз. Сондай ескі құрылыс қалдықтарын әлеуметтік осал топтарға беру керек немесе арзан бағада сату қажет. Олардың шағын уақытша тұрақ салып алуларына үлкен көмек болады, - деді ол.
Праймериз қатысушысы қоқыс сұрыптауға қатысты түсіндірме шаралар халық арасында кеңінен өткізіліп, «жасыл экономикаға» көшу науқанын тездету керектігін алға тартты.
Фото: ашық дереккөз
Айнара Байжан
