Әлеуметтік жобаға өтінім қабылдау басталды: Мүмкіндіктері мен ерекшеліктері
Қазан айының басында жас кәсіпкерлер арасында әлеуметтік жоба авторларының әлеуетін ашуға және қолдауға бағытталған «3.2.1. Старт!» жобасының жетінші маусымына өтінім қабылдау басталған еді. Қатысушылар оқытудың мазмұнды инкубациялық бағдарламасынан өтеді, содан кейін үздік идея авторлары өз бастамаларын іске асыруға грант алу мүмкіндігіне ие болады. Бүгін елордада өткен «ТДМ (Тұрақты даму мақсаттары) іске асырудағы жастардың үлесі» атты дөңгелек үстелде жоғарыда аталған мәселелер талқыға түсті. Толығырақ Strategy2050.kz тілшісінің материалында.
Ұйымдастырушылардың хабарлауынша, жоба авторлары БҰҰ-ның тұрақты дамуының 5 жаһандық мақсатының біріне қол жеткізуге өз үлесін қосуы керек. Атап айтсақ, сапалы білім, таза су және санитария, арзан және таза энергия, жауапты тұтыну және өндіріс, климаттың өзгеруіне қарсы күрес мәселелерін шешетін жоба болуы керек.
Жиынға қатысқан Coca-Cola Icecek Kazakhstan корпоративтік қатынастар жөніндегі директоры Алима Исембаева жастарды жоба ұсынып, грант алуға шақырды.
«Әлеуметтік салаға бей-жай қарамайтын жастар өздерінің шығармашылық идеяларын ұсына отырып, әлеуметтік жобаларға белсенді түрде қатыса алады. Ондай жастар біздің еліміздің дамуын ілгерілетіп, жақсы бағыттарға өзгерте алады», - деді ол.
Сонымен бірге, ол алты жылдан астам уақыт бойы CCI компаниясы Қазақстандағы жастарды әлеуметтік кәсіпкерлікке тарту, оқыту және оларға елдің әлеуметтік-экономикалық дамуына өз үлестерін қосуға көмектесіп келе жатқанын атап өтті.
Бұдан бөлек, ҚР Парламенті Мәжілісінің депутаты Елдос Абақанов мемлекет, қоғамдастық және бизнес еліміздің әлеуметтік-экономикалық дамуы үшін бірлесіп жұмыс істеген кезде тепе-теңдікті сақтап отырса, жұмыстың жанданатынын баса айтты.
«Сондықтан бизнеске өз үлесін қосу, әлеуметтік жобаларға инвестиция салу, жастардың дамуына мүмкіндік беру керек деп санаймын», - деді Елдос Абақанов.
Бұдан басқа, «Атамекен» ҰКП сауда және шағын бизнесті дамыту департаментінің директоры Әсет Айтбаев кәсіпкерлерді ақпараттандыру үшін барлық гранттық бағдарламаларды бақылап отыратынын жеткізді.
«Жобаны қолдай отырып, одан жастар өз бастамаларын жетілдіруде. Жоба туралы ақпараттандыру және кеңес беру жұмыстары 190 ауылдық елді мекендердегі және 19 облыс орталықтарындағы кәсіпкерлерге қызмет көрсету орталықтарында жүргізілетін болады», – деді депутат.
Жалпы, Coca-Cola Icecek Қазақстан компаниясының мақсаты - Қазақстанның белсенді жастары үшін «3.2.1. Старт!» жобасын одан әрі дамыту және кеңейту. Өтінімдерді жинау кезеңі 2021 жылдың 1 қазанынан 2022 жылдың 31 қаңтарына дейін жүргізілетін болады. Өтінімді www.321start.kz сайтында және @321_start Instagram парақшасында да беруге болады.
Айта кетейік, «3.2.1. Старт!» жобасы» – CCI Қазақстан компаниясының бастамасы бұл ел мәселесіне бей-жай қарамайтын жастар үшін, өз ұстанымы мен мәселелерін шешудегі жаңа тәсілдер туралы мәлімдеуге, сондай-ақ ұлттық мақсаттарды іске асыруға мүмкіндік болды.
Назерке Сүйіндік
