• Басты
  • Әлеуметтік маңызы бар азық-түліктердің бағасы: Қай өңірлерде қымбаттады

Әлеуметтік маңызы бар азық-түліктердің бағасы: Қай өңірлерде қымбаттады

14 Қыркүйек, 2021 09:55

Бүгін үкімет отырысында ҚР Сауда және интеграция министрі Бақыт Сұлтанов 7 айдың қорытындысы бойынша шикізаттық емес тауарлар экспорты туралы баяндады. Оның дерегінше, шикізаттық емес тауарлар экспортының көлемі 23,4%-ға өсіп,  10,4 млрд. долларды құраған. Сондай-ақ, министр жыл басынан бері әлеуметтік маңызы бар азық-түлік бағаларының қымбаттағанын тілге тиек етті. Оның мәліметінше, азық-түлік бағасы еліміздің басқа аймақтарымен салыстырғанда оңтүстік өңірде қымбаттай түскен. Толығырақ Strategy2050.kz тілшісінің материалында.


Әлеуметтік маңызы бар азық-түлік бағалары
  «Жыл басынан бері әлеуметтік маңызы бар азық-түлік тауарларының бағасы 9,7%-ға өсті.Жалпы өсудегі үлесі 5,9 %-дық тармақты құрап отырған көкөністер едәуір қымбаттады», - деді министр
Сонымен қатар, ол ішкі нарықты жаңа піскен отандық көкөністерімен қанықтыру нәтижесінде тамыз айының ортасынан бастап бағалар тұрақтанып, төмендей бастағанып айтып өтті. Соңғы 3 аптада бағалар 0,7 %-дық тармаққа төмендеген. Ең жоғары өсу сәтінен бастап картоп 64%-ға, сәбіз 54%-ға, пияз 4%-ға, қырыққабат 2%-ға арзандаған. Оның дерегінше, бағаның ең жоғары өсуі 11,4% – Түркістан облысында және 11,0% – Қызылорда облысы мен Нұр-Сұлтан қаласында тіркелген. Ал бағаның ең төмен өсуі 8,6% – Қарағанды облысында, 8,9% – Алматы қаласында және 9,2% – Алматы облысында белгіленген.

Шикізаттық емес тауарлар экспорты

ҚР Сауда және интеграция министрі Бақыт Сұлтановтың дерегінше, биылғы 7 айдың қорытындысы бойынша шикізаттық емес тауарлар экспортының көлемі 23,4%-ға өсіп, 10,4 млрд. долларды құраған. Соның ішінде, өсу драйверлері мыс пен катодтардың экспорты 40%-ға, ферроқорытпалар жеткізу 26,7%-ға, сондай-ақ болат прокатын жеткізу 95,4%-ға өскен. Сонымен бірге, оның сөзінше COVID-19 негізінен қызмет көрсету нарығына әсер еткен.

«Ағымдағы жылдың бірінші тоқсанының қорытындысы бойынша қызметтер экспорты 21,2%-ға немесе 1,5 млрд. доллардан 1,2 млрд. долларға дейін қысқарды», - деді министр.
Сондай-ақ, ол шикізаттық емес экспорттың көлемін ұлғайту мақсатында экспортқа бағдарланған тікелей шетелдік инвестицияларды тарту қажеттігін атап өтті. Инвестициялық жобаларды келісу кезінде шарттардың бірі шикізаттық емес тауарлардың экспортқа бағдарлануы тиіс.

Ішкі сауда саласы

Оның сөзінше, ішкі сауда саласында да оң динамика байқалады. Мәселен, саудадағы жалпы қосылған құнның нақты көлем индексі ағымдағы жылдың сегіз айының қорытындысы бойынша 109,1%-ды құраған.

«Бұл іс жүзінде 2020 жылы саланың даму шығындарын өтейді. Электрондық коммерцияның белсенді дамуы жалғасуда. Ағымдағы жылдың бірінші жартыжылдығында жалпы бөлшек саудадағы электрондық сауданың үлесі 12,2%-ды құрады, бұл 2020 жылдан 2,5 %-дық тармаққа жоғары», - деді Бақыт Сұлтанов.
Сондай-ақ, оның сөзінше ішкі сауданың даму көрсеткіштері бизнестің қазіргі жағдайларға бейімделгенін және одан әрі дамып келе жатқанын көрсетеді.


Барлық жаңалықтар