Елордада Таеквондодан ашық республикалық турнир өтіп жатыр
25 Қараша, 2019 17:25
Елордада Таеквондодан ашық республикалық турнир, Кореяның Қазақстандағы елшісінің кубогы өтіп жатыр. Турнир екі күнге созылады. Бүгінде Таеквондомен 20 мыңға жуық қазақстандық айналысады, деп хабарлады Strategy2050.kz тілшісі.
Кореяның Қазақстандағы елшісі Ким Дэсик республикалық турнирге бастауыш сыныптардың оқушылары қатысып жатқанына ризашылығын білдірді.
«Бүгін ата-аналар да өз балаларын қолдауға келіп, турнирге қатысып жатқанына бек қуаныштымын. Жалпы, кішкентай жеткіншектер Қазақстан мен Кореяның арасын байланыстыратын,екі ел арасындағы ынтымақтастықты нығайтатын келешек деп білемін», - деді К.Дэсик.
Сонымен қатар, елші турнирге қатысушылардың дайындықтарын жоғары дәрежеде бағалады.
«Таеквондо спорт түрі ретінде денені ғана шынықтырып қоймай, адамның ой-өрісін тереңдететін спорт түрі екенін айтқым келеді. Сондықтан да, денені ғана шынықтырып қоймай, рухани тарапты да, ой-өрісті дамыту қажеттігін ұмытпау керек. Биылғы республикалық турнир үлкен ауқымда өтіп жатыр. 9 облыстан, 3 республикалық қаладан 500-ге жуық қатысушы келген. Жеткіншектер таеквондомен айналысу нәтижесінде Кореяға да барып, өз мүмкіндіктерін пайдаланады деген ойдамын», - деді ол.
Сонымен қатар, елші Таеквондоның ерекшелігіне де тоқтап өтті.
«Бұл өзге спорт түрлеріне қарағанда, басқа адамдарға бірінші ешқашан тиіспейтін спорттың түрі. Жаныңдағы әлсіз адамдарға көмектесу үшін, әділетсіздікті болдырмау үшін қолданылады», - деді ол.
Өз кезегінде ҚР Таеквондо федерациясының вице-президенті Арман Чилманов турнирді өткізудің басты мақсаты – екі ел арасындағы қарым-қатынасты тереңдете түсіру екенін айтты.
«Осы турнирде байқау ұйымдастырылып отыр. Оның жеңімпазы келесі жылы Корея еліне Елшілік атынан барып келуге мүмкіндік болады. Қатысушыларға жеңіс тілеймін», - деді А.Чилманов.
Аягөз Құрмаш
