Елордада құтқарушылар күні атап өтілді

19 Қазан, 2021 17:31

Бүгін құтқарушылар күніне орай Нұр-Сұлтан қаласы Төтенше жағдайлар департаменті осы жазда ашылған құтқарушылар скверінің аумағында саябағында құтқарушылардың кәсіби мерекесіне арналған салтанатты іс-шара өткізілді. Жиында ант қабылдау рәсімі ұйымдастырылды, деп хабарлады Strategy2050.kz тілшісі.

Жиын барысында гарнизонның жеке құрамын ТЖД бастығы полковник Қуанар Базарбаев салтанатты түрде құттықтап, жас қызметкерлердің антын салтанатты түрде қабылдады.

«Құтқарушы мамандығы-жоғары және жауапты мамандық, оның басты міндеті адам өмірін құтқару болып табылады. Ерлік, батылдық пен абырой - бұл әрбір қазақстандық құтқарушыға тән, күнделікті жұмыста да, ең қиын жағдайларда да көрініс табатын қасиеттер», - деді Қуанар Базарбаев.

Осыдан тура 26 жыл бұрын "Қазақстан Республикасының орталық атқарушы органдарының құрылымын жетілдіру туралы" Қазақстан Республикасының Тұңғыш Президенті Н. Ә. Назарбаевтың 1995 жылғы 19 қазандағы № 2541 Жарлығымен Қазақстан Республикасының Төтенше жағдайлар жөніндегі мемлекеттік комитеті – елдің табиғи және техногендік сипаттағы төтенше жағдайлар және азаматтық қорғаныс саласындағы уәкілетті орталық атқарушы орган ретінде құрылды. Қазіргі таңда елордалық Төтенше жағдайлар департаменті штаттық саны 1728 адамнан тұратын, қуатты, ұтқыр және техникалық жағынан жақсы жарақтандырылған құрылым болып табылады. Оның жарақтандыруында 14 өрт сөндіру бөлімі, жедел-құтқару жасағы және мемлекеттік меншіктің аса маңызды объектілерін күзету жасағы бар.

Сондай-ақ, сауатты және нақты үйлестірілген іс-қимылдардың арқасында жүздеген азаматтарымыз құтқарылған.Ағымдағы жылдың 9 айында елордалық құтқарушылардың күшімен 317 адам құтқарылды, үйінділер мен өрттерден 408 адам эвакуацияланды. Тоғыз ай ішінде елордалық гарнизонның құтқару бөлімшелері 4185 жедел шығуды жүзеге асырды, "112" пультіне халықтан 508 236 қоңырау түскен.

Салтанатты іс-шараға Нұр-Сұлтан қаласы «Байқоңыр» ауданының әкімі Нұрбол Нұрсағатов пен осы саланың ардагерлері қатысты. Сонымен қатар, жас құтқарушы Жәнібек Әлішер қызметке қалай келгені туралы айтып берді.

Ол қазіргі уақытта Технология, бизнес университетінде құтқарушы мамандығы бойынша білім алуда. Ол бұл салаға өз еркімен келгенін айтып өтіп, бала күнгі арманым құтқарушы болу екендігін жеткізді.

«Үлкен ағаларым да осы мамандықта оқыған. Кішкентайымнан ағаларымның формаларын, олардың құтқарушы екенін көріп өскендіктен, өзімнің де осы салаға келетінімді білдім», - деді Жәнібек Әлішер.

Ол өз сөзінде алдағы уақытта жалынмен, ажалмен бетпе-бет келгенде батылдық танытатынын жеткізді. Оның сөзінше, бұл салаға келетін құтқарушылар алдын ала нақты шешім қабылдап келеді деп ойлайды.

«Өйткені, әр құтқарушыны үйінде күтіп отырған ата-анасы, бала-шағасы, отбасы бар. Қазақта «ер ел үшін туады» деген жақсы сөз бар. Бәрі тек отбасын ғана ойлай берсе, елімізді кім қорғайды?»- деді Жәнібек Әлішер.