Е.Бекхожин: Ержан Максим Қазақстанның ғана емес, барлық түркі әлемінің намысын қорғайды

"Биылғы жарысқа 19 ел қатысады. Атап айтсам,  олардың қатарында Албания,  Армения,  Австралия, Беларусь, Польша, Франция, Грузия, Ирландия,  Испания, Италия,  Қазақстан, Мальта, Солтүстік Македония, Португалия,  Ресей,  Сербия,  Нидерланды,  Украина мен Уэльс бар. Ержан Максим еліміздің намысын лайықты дәрежеде қорғайтынына сеніміміз мол. Сонымен қатар оның бар әлемге Қазақстанда талантты жастардың өсіп келе жатқандығын дәлелдейтініне күмәніміз жоқ",  - деді" Хабар" агенттігінің Басқарма төрағасы Ерлан Бекхожин. 

Сондай-ақ басқарма төрғасының айтуынша, Ержан Масим аталған конкурста тек Қазақстанның ғана емес, бүкіл түркі әлемінің намысын қорғамақ.

"Біз оған ел болып дауыс беру керекпіз. Әзірбайжан мен Түркияның атынан биыл аталған ән додасына ешкім қатыспайды. Сол себепті Ержан тек Қазақстанның ғана емес, барлық түркі әлемінің намысын қорғайтын болады. Сондай-ақ біз Ержанның әні менбасқа да елдердің балалары айтатын әндерді салыстырып көрдік. Алайда олардың көпшілігі ересектерге арналған әнге ұқсайды. Ал бұл балаларға арналған байқау болғандықтан, біздікі нағыз балаларға арналған арманға жетелейтін ән", - деді ол.

Ал жиынға қатысқан "Хабар" Агенттігі» АҚ Басқарма Төрағасының Бірінші орынбасары ринат Кертаев қазақ халқын аталған ән додасында Ержанды қолдап дауыс беруге шақырды.

"Ержан бүкіл елдің үмітін ақтап, үлкен бір белесті бағындырып келеді сенімдеміз. Барлығымыз тілекші болайық. Дауыс беру 22 қараша күні түнгі 12- де басталады, 24 қараша күні гала концерттің соңына дейін дауыс беру жалғасады. Тек қазақстандықтар ғана емес, әлемнің түкпіріндегі Ержанның жанкүйерлері junioreurovision.tv сайты арқылы дауыс бере алады. Бұл елімізді әлемге танытатын халықаралық ең үздік шара болғандықтан, бірлігімізді осындай дүбірлі додаларда көрсетуіміз кеерк. Ел жұрт екенімізді осындай додаларда көрсетуіміз қажет. Хабар арнасының тікелей эфирінде 24 қашараша күні сағат 21:00-де көрсетіледі", - деді Кертаев.

Сонымен қатар ол халықаралық "Junior Eurovison Song Contest" ән байқауында Ержан айтатын әнге тоқталды.

"Әннің авторы композитор Хамит Шанғалиев, ал мәтінін жазғандар - Данияр Алдабергенов пен Тимур Балымбетов. "Арманыңнан қалма" деп аталатын ән кез келген адамға арманға ұмтылу керектігін, арманға жетер жолда қанша қиындық кездессе де жеңіп шығуға үндейді. Бейнеклип бір айдан бері "Хабар" агенттігіне қарайтын телеарналарда көрсетіліп жатыр. Әлем жұртшылығы тарапынан үлкен бір қызығушылыққа ие болады деген сенімдемін", - деді ол. 

Бұдан бөлек Ринат Кертаев қазақстандық кәсіпкерлер тарапынан аса бір қолдау болмағанын атап өтті.

"Мемлекет берілетін қаражат шектеулі болғандықтан, қосымша халықаралық шығындарды көтеретін демеушілерді іздегенбіз. Шынын айту керек,  алғашында көптеген кәсіпкерлеріміз қаржы жағынан қолдау білдіретінін айтқан болатын,  ал іске келгенде жанымыздан табылмады. Тек "Сарыағаш" сумаркасы өзінің патриоттығын көрсетіп қолдау білдірді, алғысымыз шексіз", - деді ол.

Ал конференцияға қатысқан Ержан болса, дайындығының керемет екендігін және халық алдында жауапкершілігін сезінетінін жеткізді.

"Дайындығым өте керемет. Алматы қаласында күніне екі сағатты дайындыққа жұмсаймыз. Бірінші вокал бойынша, сосын сосын өз әніме дайындаламыз. Елдің атынан шығатыным үшін кішкене қобалжулымын. Мен қазірге дейін Польша, Португалия және Австралия елдері өкілдерін ғана қарап шықтым. Олар ұнады маған.  Елдің алдындағы жауапкершілікті сезінемін", - деді жас әнші.

Айта кету керек, көрермендердің дауыс беруі junioreurovision.tv сайтында байқаудың финалына дейін 23-24 қараша күндері өтеді. Дауыс беру аяқталғаннан кейін де көрермендерге сүйікті әншілеріне дауыс беруге қосымша 15 минут уақыт беріледі. Ал ереже бойынша,  жеңімпазды телекөрермендердің дауыс беру нәтижесімен қатар байқауға қатысушы елдерден үшеуі ересек және екеуі балалардан құралған 5 төреші анықтайтын болады. 

Сонымен қатар, айта кетейік, былтыр аталған ән байқауында Қазақстан атынан Дәнелия Төлешова шыққан болатын. Көрермендердің дауыс беру нәтижесі бойынша,  ол үшінші орынды иеленді. Ал көрермендер мен төрешілердің дауыс беру нәтижесі бойынша алтыншы орынды алған еді. 

Назерке Сүйіндік