ДСМ: Елде коронавирус жұқтырғандар саны азайып, жағдай тұрақталып келеді

Әлемдегі жағдай

Денсаулық сақтау министрі Алексей Цойдың дерегінше, әлемде 204 миллионнан астам КВИ жағдайы тіркелген, ал күніне 500 мыңнан астам адам вирус жұқтыруда, сондай-ақ 4,3 миллионнан астам адам қайтыс болған. Инфекция жұқтырғандардың ең жоғары көрсеткіші Америкада – 78 миллионнан астам, Еуропада – 60 миллионнан астам, оңтүстік-шығыс Азия елдерінде – 38 милионнан астам, Шығыс Жерорта теңізі елдерінде – 12 милионнан астам тіркелген.

Соңғы аптада Жапонияда – 98%, Израильде – 75%, Әзірбайжанда – 69% аурудың ең көп өсуі байқалған.

Еліміздегі эпидахуал

Министрдің айтуынша, елімізде соңғы аптада коронавирусқа шалдыққандар саны 10% -ға артқан. Дельта штаммының анықталуына байланысты шілде айында сырқаттанушылықтың өсуі байқалған. Алайда, тамыз айының басынан бастап Нұр-Сұлтан қаласында коронавирустық инфекциямен сырқаттанушылықтың өсуі баяулаған және Covid-19 бойынша эпидемиологиялық жағдайдың тұрақтануы байқалған.

Оның дерегінше, 1 тамыздан бастап СOVID-19-дың таралу индексі 9%-ға төмендеген.

«1,11-ден 1,01-ге дейін, Нұр-Сұлтан қаласында көрсеткіш 1-ден, ал Алматыда R саны 19 %-ға төмендеген», - деді министр.

Төсек-орын жүктемесі

Министрдің дерегінше, төсек-орын жүктемесі осы жылдың 10 тамызындағы жағдай бойынша 328 медициналық нысанда 55 658 инфекциялық төсек-орынды құраған. Республикада төсек-орын жүктемесі 54 %-ды құраған.

«Инфекциялық стационарлардағы реанимациялық төсек-орын саны 4 969-ды құрайды, жүктеме 45%. Елдегі эпидемиологиялық ахуал ушыққан жағдайға әзірленген тағы 7 419 инфекциялық төсек-орын бар», - деді министр.

Министр инфекциялық төсек-орындардың ең жоғары жүктемесі Атырау облысы мен Нұр-Сұлтан қаласында – 69 %, Ақтөбе облысында – 65 %, Алматы қаласы мен Жамбыл облысында - 63 % екенін атап өтті.

Вакциналау қарқыны

Министрдің мәлімдеуінше, өңірлер вакцинаның жеткілікті көлемімен қамтамасыз етілген. Сондай-ақ, вакцинаны жеткізу кестеге сәйкес жүргізіліп жатыр. Вакцинацияның тиімділігін бағалау барысында аурудың 99,9%-ы вакцина алмағандарға тиесілі екендігі анықталған. Ал вакцинациядан кейін ауырғандардың үлесі не бәрі 0,1 %-ды құраған.

«Бүгінде 5,9 млн адам 1 компонентпен егілді. Бұл екпе алуға тиісті халықтың 59 %-ын құрайды. 2 компонентті екпе алуға қажетті халықтың 45,2 %-ы шамамен 4,5 млн адам алды. Вакцинацияның 1-дозасымен ең төменгі қамту проценті Маңғыстау облысында байқалады», - деді Алексей Цой.

Министрдің дерегінше, екпе алмағандар арасында COVID-19-дан өлім-жітім үлесі 97,7 %-ды құрайды. Ал вакцинация алғандар арасында қайтыс болғандар 2,3 %-ды құраған.

«Коронавирустан болатын ауыр зардаптардың алдын алуда вакцинацияның тиімділігін тағы да дәлелдейді», - деді ол.