COVID-19: Министр Қазақстандағы эпидемиологиялық жағдайға жаңа болжам айтты

«Бүгінде жасыл аймақта 8 облыс бар. Атап айтсақ, Жамбыл, Маңғыстау, Түркістан, Ақтөбе, Батыс Қазақстан, Атырау, Алматы облыстары және Шымкент қаласы. Сары аймаққа Қазақстан Республикасы мен 5 облыс кіреді, олардың қатарында Шығыс Қазақстан, Қызылорда, Қарағанды ​​облыстары, Алматы және Нұр-Сұлтан қалалары бар. Қызыл аймақта 4 облыс қалды, атап айтсақ, Ақмола, Қостанай, Павлодар және Солтүстік Қазақстан облыстары», - деді Алексей Цой.

Жалпы, ведомство басшысының сөзінше, Қазақстанда соңғы екі айда ауру көрсеткіші 4,5 есеге, ал өлім көрсеткіші 4,8 есеге төмендеген.

Оның мәліметінше, Қазақстанда 1 тамыздан бастап жұқпалы төсек орындарының жұмыспен қамтылу көрсеткіші 56-дан 37%-ға, реанимация төсек-орындары 45-тен 30%-ға төмендеген. Резервте 30 мыңнан астам төсек бар.

«Эпидемиологиялық жағдайдың тұрақтануына байланысты уақытша инфекциялық нысандарды жабу жұмыстары жалғасуда. Ағымдағы жылдың 25 тамызы мен 18 қазаны аралығында барлық облыста 103 нысан жабылды», - деді министр.

Сонымен қоса, министр 1-компонентпен 8,2 млн-ға жуық адам егілгенін атап өтті. Ал, 7,3 млн-нан астам адам екінші компонентін салдырған, Тұрғындарды КВИ-ға қарсы вакцинациялау жалғасуда. 

Бұдан бөлек, министрлік алдағы 2 айға коронавирус инфекциясы бойынша эпидемиологиялық жағдайдың болжамын жаңартқанын атап өтті.

«Болжамға сәйкес, пессимистік сценарий бойынша қарашада тіркелген жағдайлардың орташа тәуліктік саны 1,800 жағдайға дейін, желтоқсанда 2,350 жағдайға дейін жетеді. Нақты сценарий бойынша қарашада 1650 жағдайға дейін, желтоқсанда 1600 жағдайға дейін», - деді Алексей Цой.

Ал, оптимистік сценарий бойынша, қарашада 1500 жағдайға дейін, желтоқсанда күніне 1100 жағдайға дейін жетуі мүмкін деп болжанып отыр.

Сонымен бірге, ведомство басшысы Денсаулық сақтау министрлігі жергілікті атқарушы органдармен бірлесіп КВИ-дің алдын алу және эпидемияға қарсы іс-шараларды бақылауды және жүзеге асыруды жалғасып жатқанын атап өтті.

Еске салайық, соңғы мәліметтер бойынша, әлемде 244 миллионнан астам адам коронавирус жұқтырғаны белгілі болды. Күніне 3000 мыңнан астам жағдай тіркелуде. Ал, 4,9 миллионнан астам адам қайтыс болды.

Айта өтейік, Дүниежүзілік денсаулық сақтау ұйымының Еуропалық аймағының мәліметі бойынша, соңғы екі аптада 54 елдің ішінде 35 елде сырқаттанушылық көрсеткіші артқаны байқалған. Соңғы 14 күнде аурушаңдықтың ең көп өсімі Польшада байқалып отыр, онда жұқтырғандар саны - 160%-дан астамға, Венгрияда – 120%-дан астамға, Грузияда – 110%-дан астамға, Әзірбайжанда – 104%-ға өскен.

ЕуроДДҰ-ның 19 елінде сырқаттанушылықтың артуы төмендеді, соның ішінде Израильде 58%-ға, Испанияда 28%-ға, Швейцарияда 16%-ға, Черногорияда 4%-ға және Италияда 3%-ға азайған.