• Басты
  • Б.Байжұманов: Алматы облысында коронавирус жұқтырғандар саны азайды

Б.Байжұманов: Алматы облысында коронавирус жұқтырғандар саны азайды

13 Қыркүйек, 2021 12:58

Бүгін Орталық коммуникациялар қызметінде өткен баспасөз мәжілісінде Алматы облысы әкімінің орынбасары Байжұманов Батыржан өңірдегі эпидемиологиялық жағдай туралы айтып берді. Оның мәліметінше, соңғы 15 күнде коронавирус жұқтырғандар саны азайған. Толығырақ Strategy2050.kz тілшісінің материалында.

Жұқтырғандар саны азайған

Облыс әкімінің орынбасары коронавируспен күрес шаралары жалғасып жатқанын атап өтті. Оның мәліметінше, соңғы екі аптада облыста коронавируспен ауырғандардың өсу қарқыны 0,9 пайыздан 0,6 пайызға төмендеген. Ал, өткен тәулікте 218 жағдай анықталды, оның ішінде 35-і бала екені анықталған.

«Өңір қызыл аймақта. Ауруханаларға коронавирус инфекциясымен күнделікті 200-ге жуық адам түсуде. Бүгінде инфекциялық стационардың жүктемесі 55 пайызды (3360 адам, барлығы 6080 төсек бар), реанимациялық бөлім жүктемесі – 19 пайызды құрайды (97 адам)», - деді Байжұманов Батыржан.

Оның дерегінше, амбулаториялық емдеуде 6877 пациент бар, аталған пациенттерге 391 мобильді бригада қызмет көрсетеді. Сонымен қатар, облыс халқына 206 жедел жәрдем бригадасы жұмыс істейтінін еске салды. Сондай-ақ, облыстағы коронавируспен күрес жүргізіп отырған 4 орталық дәрігерлері жағдайы ауыр науқастарға күнделікті бейнекамера арқылы кеңес беріп отырғанын жеткізді.

Дәрі-дәрмек пен жеке қорғаныс құралдары жеткілікті

Бұдан бөлек, облыс басшысының орынбасары, биылғы 1 қыркүйектен бастап 15 зертханада 35 мың ПТР зерттеулері жүргізіліп, 2654 КВИ жағдайлары анықталғанын атап өтті. Оның мәліметінше, зертханалардың тәулігіне 11 мың тест жасауға мүмкіндігі бар.

«Облыстық ауруханаларда дәрі-дәрмек пен жеке қорғаныс құралдарының екі айлық қоры бар. 1,3 млрд теңгеге облыстың тұрақтандыру қоры құрылды, «ИНКАР» ЖШС қоймаларында дәрі -дәрмектер мен медициналық мақсаттағы бұйымдардың 56 атауы алынды. Облыс дәріханаларында дәрі -дәрмек тапшылығы жоқ», - деді Байжұманов Батыржан.

Халықтың 82 пайызы толық вакцина алған

Бұдан басқа, ол аймақта алгоритм бойынша халықты вакцинациялау бойынша белсенді жұмыс жүргізіліп жатқанын тілге тиек етті. 

«Әр елдімекенде 244 пункт ашық, 71 жылжымалы бригада мен 17 жылжымалы медициналық кешен жұмыс істейді. Жалпы 732 мың вакцина дозасы салынды. I компонентпен 647 мың адам немесе 88,4% тұрғын қамтылған. Сонымен қатар, II компонентпен 515 мың адамға немесе 82,3%-ына вакцина салынған», - деді ол.

Оның сөзінше, бүгінде жоспар бойынша вакцинациямен қамту 65%-ды құрайды.

«Бүгінгі таңда Балқаш (106%), Ақсу (103%) аудандарында вакцина салу аяқталды. Алайда, Панфилов (54%), Талғар (49%), Қаратал (47%) аудандарында вакцинация баяу қарқынмен жүргізіліп жатыр. Біз бұл бағыттағы жұмысты жалғастырамыз», - деді Байжұманов Батыржан.

Барлық жаңалықтар