• Басты
  • Қазақстаннан үйренеріміз өте көп - Mr. Govind Singh Dotasra
19 Қыркүйек, 2019 12:45

Қазақстаннан үйренеріміз өте көп - Mr. Govind Singh Dotasra

Бүгін ресми ашылуы өткен PATA (Азия және Тынық мұхиты елдерінің туристік ассоциациясы) көрмесінде өз павильондарын әзірлеген елдердің ішінде Үндістанның Раджастан аймағы да бар. Раджастанның туризм министрі Mr. Govind Singh Dotasra Қазақстаннан алған әсерімен және өз өңірлеріндегі туризмді дамыту саясаты туралы Strategy2050.kz тілшісіне берген сұхбатында бөлісті.
Қазақстаннан үйренеріміз өте көп - Mr. Govind Singh Dotasra

-Қазір Раджастанда туризмді дамыту үшін қандай саясат қолданылып отыр?

f9ad0d54-78c8-4ac2-9328-173fa7207013.jpg

-    Біріншіден, Раджастан- шөлді аймақ. Алайда, ол тек шөл даласымен ғана емес, өзге де әсем жерлері және киелі орындарымен танымал. Өзен, тау, сулары да баршылық. Сонымен қатар, Раджастан Үкіметі туризмге ерекше көңіл бөледі. Бірінші орында – туристердің қауіпсіздігі. Қазірдің өзінде туристер полицияны іздемейді, арнайы дүңгіршектерге жүгіне алады. Туристерге көмек беру үшін арнайы осындай саясат ұстанып отырмыз. Осының барлығы елге келген туристер өздерінің қауіпсіздікте екенін сезініп, оларға қамқорлық әркез көрсетілетінін сезіну үшін жасалып отыр. Екіншіден, тазалыққа көп көңіл бөлінеді. Джайпур сынды қалалардың күзеті шаһардың таза болуын ерекше қадағалауда ұстайды. Себебі, туристер өздерін үйлерінде сияқты қолайлы сезінулері керек.

-         PATA көрмесіне қатысуларыңыздың мақсаты қандай? Көрменің әлеуетіне қандай баға бересіз?

-         Бұл шараға қатысып отырғанымызға өте қуаныштымыз. Раджастан туралы адамдар кеңінен білсе екен деген ниетпен келдік. Бұл шақыртуды аса үлкен мүмкіндік деп қарсы алып, ыстық ықыласпен қабылдадық. Себебі, біз туризмді ілгерілендіргіміз келеді. Көрсететін, бөлісетін «дүниелеріміз» өте көп. Раджастанға келсеңіздер, түрлі қанық түстерден құралған киімдерге, ауқаттанған адамдарға көздеріңіз түседі. Демек, барлық колоритті дүниелерге қанығып, Раджастан туралы мәліметке толыққанды ие бола аласыз. Себебі, Раджастан – тек шөл дала емес, мәдениет пен этномәдениетке ие аймақ.

-         Орташа есеппен бір турист Раджастанда қанша қаржы кетіреді?

-         Раджастанға сапардың қаржылай сомасы әрбір туристің қалауы мен талғамына байланысты болады. Егер ол жайлы демалысты таңдап, «all inclusiveті» қаласа, оған әсем әрі қымбат қонақ үйлерді ұсынуға болады. Ең үздік сервистік қызметке ие болып,көркем жерлерді аралауына болады. Егер де, сапар бюджеттік болса, туристер арзан нұсқаларды таңдай алады. Қонақ үйлер өте қауіпсіз. Ол жағын алаңдамауға болады. Раджастан бойынша ұшақпен, көлікпен де саяхатауға болады. Раджастанда киелі орындар өте көп. Олар арнайы күзетке алынған. Джайпур - туристердің ошағы. Қазір көптеген туристер Джайпурға келіп жатыр.

-         Жалпы, Қазақстанның туристік даму әлеуетіне қандай баға бересіз? Өз тарапыңыздан қандай тәжірибемен бөлісіп, кеңес бере аласыз?

-         Тағы да айта кетейін, Қазақстанға келгенімізге өте қуаныштымыз. Нұр-Сұлтан – өте жас қала. Адам өмір сүруіне қолайлығы, ыңғайлығы таң қалдырды. Көшелері таза, ғимараттары әсем. Ерекше бір ләззат сыйлайды. Қозғалыстың өзі рет-ретімен. Қазақстанның өзінен үйренеріміз өте көп. Раджастанның туристері көбінесе Ресейге саяхат жасайды. Көп турист Қазақстан туралы аз ақпараттанған. Бұл аз ақпаратпен қамтылу бойынша өзара ұқсас тәжірибе деп ойлаймын. Себебі, Раджастан туралы да қазақстандықтар аса біле бермейді. Соны жолға қою үшін Қазақстанға келдік.

-Сұхбатыңыз үшін рақмет!

Айта кетейік, көрмеге 32 елден 250 селлер келген.

Аягөз Құрмаш 

Барлық жаңалықтар