• Басты
  • Қазақстандықтар Елбасы медалімен марапатталды

Қазақстандықтар Елбасы медалімен марапатталды

19 Наурыз, 2021 14:59

«Елбасы Медалі» жобасына қатысушылар карантин кезеңінде волонтерлік жобаларды іске асырып, көп балалы отбасылар мен медицина қызметкерлерінің отбасыларына көмектесті, деп хабарлады Нұрсұлтан Назарбаев Қорының баспасөз қызметі.


Бұл күндері Қазақстанның барлық өңірінде қола деңгейіне қатысушыларды Елбасы медалімен мараппаттауға арналған салтанатты іс-шаралар өтуде. Жеңімпаздар саны бойынша Алматы (384) және Шығыс Қазақстан (340) облыстары көш бастады.

Нұр-Сұлтанда 165 қатысушы жеңімпаз атанды. 6 ай бойы өзін-өзі дамытумен айналысқан жастарды марапаттау Оқушылар сарайында өтті.

«Елбасы медалі» - еліміздегі ең ауқымды challenge, оған қатысуға 14 пен 29 жас аралығындағы жастар шақырылады. Қатысушылар қола, күміс немесе алтын деңгейді таңдап, 6 айдан 18 айға дейінгі бағдарлама талаптарын орындауы керек. Осы уақыт аралығында олар өз дағдыларын 7 бағытта дамытады: спорт, дарын мен дағды, кітап оқу, ұлттық мұра, еріктілік, туристік саяхаттар және еңбек тәжірибесі.

«Елбасы медалі» жобасына қатысып, бұл керемет тәжірибе болатынын жақсы түсіндім, бірақ жобаға қатысу менің өміріме қаншалықты әсер ететінін елестете алмадым. Жобада мен «Еріктілік», «Кітап оқу», «Дарын мен дағды» бағыттары бойынша алға қойған мақсатыма қол жеткіздім. Жобаға алғысым шексіз! Жаңа қырларымды аштым, бұған дейін айналысқан қызығушылықтарыма жаңаша көзқарас пайда болды. Ең бастысы мен жаңа достар таптым! Олардың барлығы белсенді, қызықты, идеялық және жарқын жандар», - деді өз әсерімен бөліскен жоба қатысушысы Жарас Жеңісов.

2020 жылы «Елбасы медалі» бағдарламасы еліміздің барлық өңірлерінен 11 мыңнан астам қатысушыны қамтыды, қатысушылардың жалпы санының 23% ауыл балалары. 3 535 адам қола деңгейін сәтті аяқтады.

«Жобаға қатысу барысында мен болашақта қажет болатын тәжірибе алып үлгердім! Еріктілік бағыты ерекше орын алды. Себебі бұған дейін мен бұл саламен кездеспеген едім, енді басқаларға тұрақты түрде қалай көмектесуге болатынын білемін. Құрметті Елбасына жастарға арналған осындай бастама үшін зор алғысымды білдіремін», - деді жоба қатысушысы Алтынбек Әбілда.

Ата-аналар да өз әсерлерімен бөлісті: 

«Менің қызым Нұрметова Наргиз, 14 жаста, 6 ай ішінде ол «Жыл еріктісі» халықаралық байқауына қатысты, БҰҰ Қоры ұйымдастырған «COVID-19-ға қарсы күрескен әйелдер» фотокөрмесіндегі кейіпкерлердің бірі болды, «Қаржылық сауаттылық», «Цифрлық сауаттылық», «Мобилография» және т. б. онлайн-курстардан өтті. Қатысушылардың ата-аналары атынан құрметті Елбасына балаларымызға осындай мүмкіндік бергені үшін зор алғысымды білдіремін!», - деді Зухра Нұрметова.

Анель Башарова – Талдықорған қаласындағы Назарбаев Зияткерлік мектебінің 10 сынып оқушысы. Карантин режимі мен онлайн оқытуға қарамастан, ол медициналық қызметкерлердің балаларына қосымша білім беру бойынша волонтерлік жобаны бастады. Аптасына екі рет оқушы онлайн режимде ағылшын тілінен сабақ берді. Оның бастамасын сыныптастары мен достары да қолдады. Көп ұзамай оныншы сынып оқушысының идеясы ауқымды онлайн-жобаға айналды. Оқушылар республиканың әр өңіріндегі, соның ішінде шалғай ауылдардағы және Талдықорған қаласындағы «Айналайын» балалар үйінің 150-ден астам оқушысына дәріс берді. Жас еріктілердің бастамасы тәлімгер Ирина Лянның жетекшілігімен жүзеге асырылады. 

«Жоба аясында біз балаларға ағылшын тілін үйретіп қана қоймай, мектеп бағдарламасының негізгі пәндері бойынша білім береміз. Бізде әр түрлі жастағы балалар оқиды. Балалардың сабаққа ынтасы жоғары, қызығушылығы да артты. Бұл әрине бізді шабыттандырады», – деп ойымен бөлісті Ирина Лян.

 «Елбасы Медалі» бағдарламасы 2020 жылы 11 мыңнан астам қатысушыны қамтыды, оның 3535-і Елбасы Медалінің иегері болды. Жобаны Нұрсұлтан Назарбаев Қоры мен Елбасы Академиясы «Ел Үміті» бастамасы аясында жүзеге асырады.

Барлық жаңалықтар