• Басты
  • Қазақстанда дайын өнім тауарларының экспорты артып келеді
9 Қыркүйек, 2020 11:02

Қазақстанда дайын өнім тауарларының экспорты артып келеді

Бүгін онлайн өткен үкімет отырысында ҚР Ұлттық экономика министрі Руслан Дәленов елдің әлеуметтік-экономикалық дамуының биылғы 8 айдағы қорытындымен таныстырды. Ол экономиканың нақты секторларында өсім сақталғанын, экпортталатын өнім көрсеткішінің артқанын, сонымен қоса карантиннен кейін азаматтарды, ШОБ-ты қолдау үшін қабылданған шараларға тоқталды, деп хабарлады Strategy2050.kz тілшісі.

Қазақстанда дайын өнім тауарларының экспорты артып келеді

Руслан Дәленов тамыздың екінші жартысында қызметтер секторындағы бірқатар саланың жұмысы қайта жанданғанын атап өтті. Оның сөзіне сүйенсек, экономиканың нақты секторларында өсім сақталып отыр. Оның қатарына құрылыс, ауыл шаруашылығы және өңдеу өнеркәсібі кіреді. Сонымен қатар дайын өнім тауарларының экспорты артқаны байқалуда.

Жылдық инфляция 7 пайызға дейін бәсеңдеді. Тауарлар өндірісі 1,7 пайызға артты. Сонымен қоса көрсетілетін қызметтердің көрсеткіші 6,1 пайызға қысқарған. Нәтижесінде, жедел деректер бойынша, жалпы ішкі өнім 3 пайызға төмендеген.

Экономиканың нақты секторларында өсім бар

Өндірістік сектордағы салаларда, оның ішінде құрылыс – 6,5 пайыз, ауыл шаруашылығы – 4,9 пайыз және өңдеу өнеркәсібі – 3,3 пайыз өсім көрсетіп отыр.

Бұдан бөлек көрсетілетін қызметтер секторы салаларында, атап айтсақ, жылжымайтын мүлікпен жасалатын операциялар – 4,3 пайыз, әкімшілік қызметтерді көрсету – 5,1 пайыз, сауда – 10,5 пайыз және көлік қызметтері – 16,1 пайызға азайған. Ал байланыс қызметтері - 8,3 пайызға артқан. Бұдан бөлек республика бойынша тұрғын үйді пайдалануға беру 6,4 пайызға артқан.

Нақты секторлар бәсекеге қабілеттіліктің жақсы нәтижесін көрсетіп отыр. Мәселен, есепті кезеңде автомобиль жасау - 51,8 пайызға, фармацевтика - 34,1 пайызға, дайын металл бұйымдары - 18,8 пайызға, қағаз өнімдері - 15,3 пайызға және жеңіл өнеркәсіп 11 пайызға артқан.

Сыртқы сауда. Экспортталатын өнімдер қатары көбеюде

Өткен жеті айдың дерегі бойынша, сыртқы сауда айналымы 48,7 млрд долларды құраған. Экспорт - 28,6 млрд долларды, импорт – 20,1 млрд долларға жеткен. Ал сауда балансының оң сальдосы 8,5 млрд доллар деңгейінде сақталып отыр.

Дайын өнімдердің экспорт көлемі артуда. Жеті айдағы статистикаға сүйенетін болсақ, автомобиль экспорты - 7 есеге, ферросилиций - 6 есеге, күнбағыс майы - 1,7 есеге, титан құймаларының экспорты - 20,5 пайызға өскен. Есепті кезеңде әлемнің 105 еліне экспорт жасалды.

Өнеркәсіп өндірісі

Өнеркәсіп өндірісі 0,4 пайызға артты. Руслан Дәленовтың сөзіне сенсек, өсім өңдеу өнеркәсібінің 3,3 пайызға артуы есебінен болып отыр.

Өнеркәсіп бойынша Қостанай - 7,2 пайызға, Солтүстік Қазақстан - 6,8 пайызға, сонымен қоса елорда 5,5 пайызға өсім көрсетіп отыр.

Ал бес өңірде төмендеу тіркелген. Олардың қатарында Қызылорда (-11,5 пайыз), Маңғыстау (-5,9 пайыз), Ақтөбе (-2,9 пайыз), Шығыс Қазақстан (-1,5 пайыз) облыстары және Шымкент қаласы (-1,8 пайыз) бар.

Ал бұдан бөлек кен өндіру өнеркәсібі 1,5 пайызға төмендегенін атап өткен жөн.

Сонымен қоса Руслан Дәленов өңдеу өнеркәсібі 3,3 пайызға өскенін атап өтті. Өсудің жоғары қарқыны фармацевтика, дайын металл бұйымдары, машина жасау, оның ішінде автомобильдер және жеңіл өнеркәсіп саласына тиесілі.

Өңірлер бойынша жоғары өсім Қостанай (19,9 пайызға), Түркістан (14,4 пайызға), Солтүстік Қазақстан (7,8 пайызға) облыстарында байқалып отыр. Ал республиканың 4 өңірінде, атап айтсақ, Ақтөбе (-4,9 пайыз), Батыс Қазақстан (-1,2 пайыз) және Шығыс Қазақстан (-0,7 пайыз) облыстары және Шымкент қаласы (-1,8%) төмендеу байқалды.

Негізгі капиталға тартылған инвестиция

Ұлттық экономика министрі негізгі капиталға 7 трлн теңге сомасында инвестициялар тартылғанын атап өтті. Оның айтуынша, елімідің 13 өңірі, атап айтқанда, Ақмола (29,5 пайызға), Түркістан (28,3 пайызға) облыстарында және Шымкент қаласында (29,3 пайызға) негізгі капиталға тартылған инвестиция көлемі өскен. Ал 4 өңірде, Қызылорда (-35,4 пайызға), Атырау (-22,2 пайызға), Батыс Қазақстан (-14,8 пайызға), және Қарағанды (-9,5 пайызға) облыстарында төмендеу бар.

Ал министр келтірген дерекке сүйенсек, құрылыс секторы да тұрақты қарқынмен даму үстінде. Орындалған жұмыстардың көлемі 6,5 пайызға артқан. Құрылыс жұмыстары жөнінен ең жоғары өсім көрсеткен екі өңірді ерекше атап өтуге болады. Олар - Түркістан облысы (65,1 пайыз) және Шымкент қаласы (62,6 пайыз).

«Бұдан бөлек пайдалануға берілген тұрғын үйлердің де көрсеткіші артты. Бүгінге дейін 8,1 млн шаршы метр тұрғын үй пайдалануға берілді. Бұл өткен жылдың осы кезеңімен салыстырғанда 6,4 пайызға көп», - деді Руслан Дәленов.

Министр экономикалық белсенділікті қалпына келтіру бойынша қабылданып жатқан шараларды ескере отырып, орталық және жергілікті атқарушы органдар назар аударуы керек аспектілерге тоқталды. Оның сөзінше, біріншіден, карантиннен кейінгі кезеңде бизнестің жұмысын жан-жақты қолдау көрсеті жұмыстары жалғасуы тиіс. Екіншіден, мемлекеттік бағдарламалар шеңберінде кәсіпкерлерді қолдау құралдарын тиімді іске асыруды қамтамасыз ету керек. Үшіншіден, қазақстандық өнімнің үлесін арттырып, жұмыспен қамтуды қамтамасыз ететін қаражатты толық және тиімді игеруді қадағалау қажет. Сонымен қоса инвестиция тарту көлемін арттырып, инвесторлармен нақты жұмыс істеу керек. Бұдан бөлек, өңделген тауарларды өндіру және экспорттау үшін жағдай жасалу керек. Баға мониторингін күшейтіп, Тұрақтандыру қорларының тетіктерін пайдалану арқылы маусымдық ауытқуларға жол берілмеуі тиіс. Өңірлік еңбек нарықтарындағы ахуалға тұрақты мониторинг жүргізіп, тұрғындарды барынша жұмыспен қамтуды назарда ұстау керек.

Барлық жаңалықтар