• Басты
  • Қазақстан мен Ресей Омбыда өтетін форумға дайындықты талқылады

Қазақстан мен Ресей Омбыда өтетін форумға дайындықты талқылады

9 Қазан, 2019 14:54
Ресей Сыртқы істер министрі Сергей Лавров екі күндік ресми сапармен Қазақстанға келіп, қазақстандық әріптесі Мұхтар Тілеубердімен кездесті. Кездесу барысында Омбыда өтетін 16-шы форумға дайындық барысы талқыға түсті, деп хабарлады Strategy2050.kz тілшісі. 

«Біз екі жақтың Президенттері қабылдаған шешімдерді орындап, қадағалаймыз. Оның ішінде 9 қарашада Петропавлда өткен Өңіраралық ынтымақтастықтың 15-ші форумы аясында қол қойылған 2019-2021 жылдарға арналған бірлескен іс-қимыл жоспарының орындалуы. Сондай-ақ, біз қарашада Омбыда өтетін 16-шы форумға дайындықты талқыладық. Ал осы форумның қарсаңында Қазақстан мен Ресейлік жас көшбасшыларының алғашқы форумы өтеді, онда екі жақтан сыртқы істер министрліктерінің жас қызметкерлері қатысады», - деді Лавров.

Сонымен қатар, Ресей Сыртқы істер министрі әріптесін жаңа қызметімен құттықтады.

"Мен сізді ҚР Сыртқы істер министрі қызметіне тағайындалуыңызбен құттықтаймын. Сіздің тәжірибеңіз Қазақстанның сыртқы саясатын одан әрі дамытып, Қазақстан мен Ресейдің қарым-қатынасын арттыруға көмектеседі деген сенім білдіремін", - деді Лавров.

Бұдан бөлек,  кездесу барысында қос тарап екі елдің халықаралық ұйымдар мен өңірлік интеграциялық бірлестіктер бойынша өзара іс-қимылын, ұжымдық қауіпсіз шарты ұйымының Қырғызстан астанасы Бішкек қаласында өтетін шараларын және басқа да екі жақты және көп жақты шараларды ұйымдастыру мәселелерін талқылады.

Назерке Сүйіндік 


Барлық жаңалықтар