• Басты
  • Қазақстан кей елдер ғасырлап өткен жолды аз уақыттың ішінде бағындырды – Қазан мэрі

Қазақстан кей елдер ғасырлап өткен жолды аз уақыттың ішінде бағындырды – Қазан мэрі

10 Қазан, 2019 13:36

Қазақстан кей елдер ғасырлап өткен жолды аз уақыттың ішінде бағындырды. Бұл туралы Қазан қаласының мэрі Ильсур Метшин Нұр-Сұлтандағы UNWTO туристік саммиті аясында журналистерге берген сұхбатында айтты.

Қазан қаласының мэрі Ильсур Метшин осындай алаңда әлемнің үздік сарапшылары жиналып, тәжірибе алмасқандары өте тиімді екенін атап өтті.

«Әлемдік туризмде алдыңғы орындарды иеленіп келе жатқан елдердің өкілдері бар. БҰҰ аясында өтіп жатқан шара біз үшін, яғни мэрлер үшін өте маңызды. Себебі, барлығын білетін мэр болмайды. Әр қала өзіндік ерекшелікке, айырмашылыққа ие. Әр қаланың өзіне тән қайсарлығы мен қайраттылығы болады. Сондықтан да, әр салада әрқалай мықты болып жатады. Тәжірибе алмасып, тек өзімізге керекті тұстарды алу өте маңызды», - деді И.Метшин.

Сонымен қатар, қала басшысы Қазақстан -Татарстан үшін бауырлас ел, халық екенін атап өтті.

«Біз Қазақстанның жетістігін қызығушылықпен тамашалап отырамыз. Қазақстаннан әркез үйреніп жүреміз, үлгі аламыз. Қазақстан кей елдер ғасырлап өткен жолды аз уақыттың ішінде бағындырды. Біз әркез осындай жетістіктерге жеткен Қазақстан үшін қуанамыз», - деді ол.

Сондай-ақ, қала мэрі бұл оның Қазақстанға жасаған алғашқы сапары емес екенін айтып өтті.

«Қазақстанға бірнеше мәрте келдім. Әр келген сайын даму қарқынын көріп, тамсанамын. Экономика, бизнес те ілгері дамып жатыр. Орнында тұрмайтыны көрініп тұр. Қазақстандағы татар халқымен де тығыз қарым-қатынастамыз. Жақында ғана осы елде өткен «Сабантойға» даа келгенбіз. Бұл қарым-қатынастар барлық бағыт бойынша дамып жатыр», - деді ол.


Аягөз Құрмаш 

 

Барлық жаңалықтар