Астанадағы проблемалы объектілердің құрылысын аяқтау үшін 40 млрд теңге бөлінді
Елордадағы проблемалы обьектілер құрылысын аяқтау үшін "Нұрлы жер" мемлекеттік тұрғын үй бағдарламасы аясында Ұлттық қордан 40 млрд теңге бөлінді. Бұл туралы елорда әкімінің орынбасары Алтынбек Қайсағалиев баспасөз мәжілісінде айтты, деп хабарлады Strategy2050.kz тілшісі.
"Бүгінгі күні мемлекеттік органдардың және тұрғын үй құрылыс кооперативтері төрағаларының жұмыс нәтижелері бойынша елордада проблемалы обьектілер саны 51-ден 48-ге азайып отыр. Бұл 71 тұрғын үйді қамтып отыр, оның ішінде 13054 үлескер бар. Проблемалы 3 обьект пайдалануға енгізіліп, тағы 7 обьектіні биылғы жылдың аяғына дейін енгізу жоспарда тұр. Ал 19 обьекті бойынша іс-қимыл жоспарлары айқындалды. Мұнда құрылысты салып бітіру үлескерлер мен инвесторларды тарту жолымен дербес жүзеге асырылып жатыр. Сондай-ақ 29 ерекше проблемалы обьекті "Нұрлы жер" мемлекеттік тұрғын үй құрылы ы бағдарламасы аясында аяқталатын болады", - деді елорда әкімінің орынбасары.
Сонымен қатар Алтынбек Қайсағалиевтің айтуынша, елордадағы проблемалы объектілердің құрылысы алдағы 3-4 жылда аяқталмақ.
"Астанадағы проблемалы обьектілердің құрылысын аяқтау үшін Ұлттық қордан 40 млрд теңге қарастырылды. Қазіргі таңда әкімдіктің уәкілетті ұйымы "Елорда құрылыс компаниясы" ЖШС 6 млрд теңгені игерді. Ағымдағы жылдың соңына дейін 14 млрд теңгені игеруді жоспарланды. Ал қалған 20 млрд теңге 2020 жылдың бірінші жартыжылдығында игерілетін болады. Сөйтіп, асатанадағы проблемалы объектілердің құрылысы алдағы 3-4 жылда аяқталады. Жоспар бойынша 2019 жылы 10 объектіні, 2020 жылы 20 объектіні, 2021 жылы 7 объектіні, 2022 жылы 9 объектіні, 2023 жылы 4 объектінің құрылысы бітеді", - деді ол.
Бұдан бөлек, баспасөз мәжілісіне қатысқан ҚР Индустрия және инфрақұрылымдық даму министрлігінің Құрылыс және тұрғын үй коммуналдық шаруашылық істері комитетінің төрағасы Мархабат Жайымбетов тұрғын үйді іске қосу көлемі бірнеше есеге артқанын атап өтті.
"Республикамызда қабылданып жатқан мемлекеттік қолдау шаралары тұрғын үй құрылысын белсенді дамуын қамтамасыз етті. 2005 жылдан бастап бірқатар мемлекеттік бағдарламаларды жүзеге асыру нәтижесінде жаңа тұрғын үйді іске қосу көлемі 2005 жылғы деңгейден 2,5 есеге артып, инвестициялар 4,6 есеге өсті. Тәуелсіздік алғаннан бері елімізде барлығы 141 млн шаршы метр жаңа тұрғын үй салынды", - деді комитет төрағасы.
Сондай-ақ Мархабат Жайымбетов атап өткендей, соңғы он жылда тұрғын үймен қамтамасыз ету бір адамға шаққанда 31 пайызға өскен.
"Соңғы жылдары қолға шаралардың арқасында сонғы он жылда бір адамға шаққандағы тұрғын үймен қамтамасыз ету 31 пайызға өсті. 2030 жылға қарай тұрғын үймен қамтамасыз етуді бір адамға шаққанда 30 квадрат метрге дейін жеткізу жоспарланып отыр. 2018 жылы "Нұрлы жер" тұрғын үй бағдарламасы бойынша 12,5 млн квадрат метр тұрғын үй салынды. Сонда бір адамға шаққанда - 0,68 квадрат метрден келеді. Бұл ТМД-ға мүше елдер арасында ең жоғары көрсеткіш. Мәселен, Ресейде - 0,56 квалрат метр, Беларуссияда - 0,40 квадрат метр, Өзбекстанда - 0,36 квдрат метрді құрайды", - деп атап өтті комитет төрағасы.
Назерке Сүйіндік
