2020 жылға қарай елімізде ЖЭК өндірілген қуат көзі 3 пайызды құрайды– Н.Қаппаров

«Еліміздің жасыл экономикаға көшу концепциясын іске асыру аясында министрлік жаңартылатын энергия көздерін дамытудың нысаналы индикаторлары мен оларға қол жеткізу жолдарын белгіледі. Мысалы, 2020 жылға қарай елімізде жаңартылатын энергия көздерінен өндірілген қуат көзі 3 пайызды құрайды», - деді Н.Қаппаров. 

Сонымен қатар ол Үкімет тарапынан мақұлданған электрэнергиясы тарифтері туралы айтты.

«Біз зерттеудің нәтижесін және еуропалық сарапшылардың ұсынымдарын ескердік. Мамыр айының соңында Үкімет жаңартылатын энергия көздерінен өндірілетін элекр энергиясы үшін тарифтерді бекітті. Жел электр станцияларында өндірілетін электр энергиясының 1 киловатт сағатына 22,68 теңге көлемінде бекітілді. Күн станцияларында өндірілетін электр энергиясының бағасы 1 киловатт сағатына 34,61 теңге, шағын су электр станцияларында өндірілген қуаттың киловатт сағаты үшін 16,71 теңге, биогаз қондырғылары қуатының киловатт сағаты 32,23 теңге мөлшерінде бекітілді», - деді министр. 

Оның айтуынша, электр энергетикасына түзетілген тариф кВт сағатына 70 теңге көлемінде.

«Отандық өндірушілерді қолдау мақсатында қазақстандық кремний негізінде фотоэлектрлі модуль қолданатын күн электр станцияларының шығаратын түзетілген тарифы кВт сағатына 70 теңге көлемінде бекітілді», - дейді. 

Индира Кауметова