Қазақстан және Канада Сауда-экономикалық әріптестік мәселелері жөніндегі іскерлік кеңесін құруға ниетті

11 Маусым, 2014 19:23

ҚР Сыртқы істер министрінің орынбасары Ержан Ашықбаев Канадада сапармен болып қайтты. Е.Ашықбаевтың Канада Сыртқы істер министрі Джон Бэрд, Сыртқы істер және консулдық қызмет істерінің мемлекеттік министрі Лин Елич, сондай-ақ, сыртқы саяси ведомство басшылығының орынбасары Питер Бим және Дэн Костелломен кездесулері екіжақты және көпжақты ынтымақтастық мәселелерінің кең ауқымын талқылауға мүмкіндік берді.

Тараптар белсенді саяси диалог пен Канаданың Қазақстанмен сауда-экономикалық әріптестігінің сәтті дамуын құптады, деп сыртқы істер министрлігінде хабарлады.

Соңғы екі жыл ішінде Канаданың Федералды Үкіметінің төрт мүшесі Қазақстанда сапармен болса, өз кезегінде, ҚР Үкіметінің бес мүшесі, Парламент Мәжілісінің Төрағасы, Бас прокурор мен басқа жоғары лауазымды тұлғалар Канадада сапармен болып қайтты.

Қазақстан ТМД, Шығыс және Орталық Еуропа мемлекеттері ішінен Канаданың ең басты сауда әріптесі болып табылса, Канада Қазақстанның екі Америка мемлекеттері ішінен аса ірі әріптесі болып табылады. Бұған 2012-2013 жж. $6 млрд. жеткен тауар айналымы туралы деректер нық дәлел.

Мұнай және газ, уран мен ауыл шаруашылығы, сондай-ақ, білім беру салаларындағы дәстүрлі өзара әрекеттестік тұсында, ҚР-дың Канадамен азаматтық авиация, атап айтқанда, әлемдегі үшінші азаматтық ұшақ өндірушісі және теміржол техникасының ең ірі өндірушісі болып табылатын «Bombardier» компаниясымен өзара ынтымақтастық етудің әлеуеті туып отыр.

теги:

деловой совет

Барлық жаңалықтар