Біз Нұрсұлтан Назарбаевқа қорларды басқаруға артқан зор сенімі үшін алғыс білдіретін боламыз - Сума Чакрабарти

 «Қазақстан Президенті жанындағы шетелдік инвесторлар Кеңесінің алдағы болатын отырысында біз Мемлекет басшысы Нұрсұлтан Назарбаевқа қорларды басқаруға артқан зор сенімі үшін алғыс білдіретін боламыз. Жұмысты одан әрі күшейту және реформаларды тереңдету үшін қосымша бөлінген қаржыны пайдалануда Үкімет бізге қолдау білдірді. Біз өзіміз қатыса алатын жобалар жөнінде Үкіметке айтқан болатынбыз. Бұлар қала шаруашылығын басқару, экология, банктік жүйедегі кеңесшілік қызмет, капитал нарығы және басқа салалар», - деді ЕБРР президенті.

Сума Чакрабарти Алматы әкімдігі мен ЕБРР арасында ұзақ мерзімдік мықты қатынас орныққанын да жеткізді, деп қала әкімдігінің ресми сайты хабарлады.

«Біз бірігіп талай істерді жүзеге асыратын боламыз. Біздің Алматыдағы бірлескен жобаларымыз өзге өңірлер үшін модель болатындығына сенімдімін. Мәселен, тұрмыстық қатқыл қалдықтарды қайта өңдеу жөніндегі жобаның потенциалы жоғары. Өзге елдерге біздің Алматымен іскерлік байланысымызды үлгі етіп көрсету мен үшін мақтаныш», - деп атап өтті Сума Чакрабарти.

Әкім Алматы кәсіпкерлерінің жарғылық қаржысында және оларды басқаруда ЕБРР-ға мемлекеттік-жекеменшік серіктестік принципі негізінде тікелей қаржыландырудың жаңа механизмін алға тартты.