Халықаралық келіссөздерді жүргізу үшін мемқызметкерлердің біліктілігі күшейтіледі

9 Маусым, 2014 11:32

ҚР Президенті жанындағы Мемлекеттік басқару акадамеиясында «Халықаралық келіссөздер: біліктілікті нығайту және машықтандыру» тақырыбында семинар өтуде, деп Академиядан хабарлады.

Семинарды Еуропалық келіссөздер және шешім қабылдау орталығының (CENAD, Бельгия) бас консультанты Дэнис Колфер жүргізуде. Оның бұл салада тәжірибесі мол, халықаралық келіссөздер жүргізу бойынша 80-нен астам семинар-тренинг өткізген.

Айта кетерлік жайт, семинардың бағдарламасы Еуропалық келіссөздер және шешім қабылдау орталығының директоры және негізін қалаушы доктор Роберт Вэйбелмен бірлесіп жасалды.

Семинарға орталық және жергілікті атқарушы органдардың мемлекеттік қызметкерлері қатысты.

Жалпы мемлекеттік басқару академиясында атап өткендей, интеграциялық процесстер, ДСҰ кіру, жаһандану заманында нәтижелі келіссөз жүргізген жөн. Ал ол үшін біліктілік пен білім ауадай қажет.

Осы ретте семинарды ойынға негіздей отырып өткізу көзделген. Онда қатысушылар белгілі бір жағдайда мәселені шешуге машықтанатын болады.