Астанада Б.Жұмағұлов оқушылар мен ұстаздарды жаңа оқу жылымен құттықтады (ВИДЕО)

1 Қыркүйек, 2013 00:00

Астанада бүгін алғашқы қоңырау 83 жалпы орта білім беретін мектепте соғылды. ҚР Білім және ғылым министрі Бақытжан Жұмағұлов 60 мектеп-лицейде өткен салтанатты шараға қатысып, оқушылар мен ұстаздарды жаңа оқу жылымен құттықтады.

«Биылғы жыл бәріміз үшін ерекше жыл. Елбасы Нұрсұлтан Назарбаев «Қазақстан-2050» стратегиясында түбегейлі жаңа мақсаттар қойып, басым бағыттарды айқындап берді. Осы міндеттердің ең бастысы – Қазақстанның әлемдегі ең дамыған елдердің қатарына кіруі. Елбасы жас ұрпаққа үлкен үміт артып отыр. Гүлденген жаңа мемлекеттің болашағы сіздер, қымбатты оқушылар! Еліміздің жарқын болашағын жасауда мүлдем жаңа білім деңгейі қажет. Біз осыған жол ашып отырмыз. Әр оқушы жаңа білім алып қана қоймай, сонымен қатар тәжірибеде, өмірде, болашақ кәсібінде қалай қолдану керек екенін үйренеді», - деп атап өтті министр.

Білім беру ұйымдарында бірінші сабақ «Қазақстан-2050» стратегиясы: Бір халық- бір ел-бір тағдыр» тақырыбына арналды. Жасөспірімдердің мемлекеттік рәміздерге құрметін қалыптастыруға, Отанын сүюге, азаматтыққа тәрбиелеуге бағытталған патриотизм сабақтарын өткізу жоспарланған.

2013-2014 оқу жылында Астанада 11 мыңнан астам бала бірінші сынып табалдырығын аттады. Жалпы, биыл 92 мыңнан астам оқушы елорда мектептерінде білім алады.

Барлық жаңалықтар