Астанада 11 мыңнан астам балғын үшін алғашқы қоңырау соғылды

1 Қыркүйек, 2013 00:00

Бүгін Қазақстан бойынша Білім күні мерекеленуде. Астананың барлық 83 мектебінде мерекелік іс-шаралар өтеді. Мектеп табалдырығын алғаш аттап отырған 11 мыңнан астам балғын үшін алғашқы қоңырау соғылады.

Астана қаласы әкімінің орынбасары Аида Балаева № 15, 36, 61, 21 және 49 мектептерде, лицейлерде болып, оқу мекемелерінің мұғалімдерімен және оқушыларымен кездесті.

«Бүгін 92 000 астам оқушы партаға отырады. Соның ішінде 11 мыңнан астам бала бірінші сыныпқа барады. Сендердің басты мақсаттарың жақсы білім алып, Қазақстанның лайықты азаматы болу. Бәріміз де өз Отанымыздың патриоттары болуымыз керек, мәдениетімізді мақтан етіп, тарихымызды біліп, мемлекеттік тілді құрметтеп, меңгеруіміз керек. Патриот болу - бәріміз де мақтан ететін өз мектебімізді, ауламызды, қаламызды сүю болып табылады»,- деді А. Балаева, оқушыларды Білім күнімен құттықтай отырып.

Оның атап өтуінше, бүгін Астананың барлық мектептері педагогтармен қамтамасыз етілген. Елордада 11 142 мұғалім жұмыс істейді. Мұнымен қоса, биыл 180 жас маман жұмысқа қабылданды.

«Алдағы 2013-2014 оқу жылы әрбір педагогикалық ұжымның қызметіндегі негізгі бағыт - мемлекеттік стандарттарға сәйкес білім беру сапасын арттыру болуы тиіс», - дейді ол.

Қазіргі уақытта қалада 83 мектеп жұмыс істейді. Соның ішінде 71 мемлекеттік және 12 жеке меншікті мектеп.