Бейжінде Қытайдағы қазақстандық студенттердің үшінші құрылтайы өтті

Үшінші құрылтайға барлығы Шанхай, Сиань, Ухань, Үрімші, Бейжін, Цзинань, Харбин, Далянь, Тяньцзинь, Цзыбо қалаларынан «Kazakhstan students association in China» бірыңғай студенттік ұйымды білдіретін 100-ден аса делегат қатысты. Бұл туралы «Халықаралық бағдарламалар орталығы» АҚ  хабарлады.

Конференцияда Қазақстан жастарына, қазақстандық студенттік қоғамдастықтар арасында өзара іс-қимыл және өзара көмек тетігін әзірлеуге қатысты мәселелер талқыланды.

Үшінші құрылтай нәтижесі бойынша Бейжін, Шанхай, Үрімші, Ухан, Сианьдағы  Қауымдастық өкілдері мен Цзинань, Харбинь, Далянь, Тяньцзинь және Цзыбо қалаларында Студенттік қоғамдастықтар қауымдастығына жаңадан қабылданған өкілдер «Жастарды жан-жақты дамыту мәселелеріндегі өзара іс-қимыл туралы меморандумға» қол қойды.

Бұған қоса, Қауымдастық Жарғысы қабылданып, нақты мақсаттар, міндеттер мен студенттік ұйымның одан әрі жұмысының бағыты анықталды.

Жалпы, бүгінде  Қытайда 10 200 қазақстандық студент оқуда.

Айтакетерлік жайт, шара Қытай Халық Республикасында ҚР Білім және ғылым министрлігінің және Қазақстан Республикасының ҚХР-дағы елшілігінің қолдауымен өткізілді. Ал, оны Қытайдағы Қазақстандық студенттердің қауымдастығымен бірлесіп «Халықаралық бағдарламалар орталығы» АҚ ұйымдастырды.