Қазақстанда санэпид жағдайды қадағалау тексерісін 3 есеге қысқарту ұсынылды – Б. Қуандықов

2 Маусым, 2014 16:41

Қазақстанда тұтынушылар құқын қорғау бойынша санэпид қадағалау тексерісін 3 есеге қысқарту жоспарланған. Бұл туралы бүгін ҚР Президенті жанындағы Орталық коммуникациялар қызметінде Үкімет отырысының қорытындысы бойынша өткен брифингте ҚР Тұтынушылардың құқығын қорғау агенттігінің төрағасы Болатбек Қуандықов мәлім етті.

«Тұтынушылардың құқығын қорғау жүйесін жетілдіру бойынша кешенді іс-шаралар үкіметте қарастырылды. Ол негізгі төрт топқа бөлінген. Біріншіден, тұтынушылардың құқығын қорғау жүйесінің жаңа үлгісі енгізіледі. Ол заң жобасының жаңа тұжырымдамасын әзірлеуді қарастырады. Онда тұтынушылардың құқығын қорғаудағы мемлекеттің, қоғамдық ұйымдардың рөлі анықталады. Сондай-ақ, тұтынушылық сауаттылықты арттыру көзделген», - дейді Б.Қуандықов.

Сонымен қатар, санитарлық-эпидемиялық бағыттағы қауіптерді бағалау мен тәуекелдерді басқару жүйесін жетілдіру көзделіп отыр.

«Үшінші бағытқа келетін болсақ, санитарлық-эпидемиологиялық бақылау мен қадағалау жүйесін реформалау. Төртіншіден, азық-түлік қауіпсіздігін қамтамасыз ету бойынша іс-шаралар кешені қолға алынады. Барлық ішкі тұтынушылық нарықты қорғау жүйесінде мемлекеттік биліктің барлық буынының нақты және үйлесімді жұмысын қамтамасыз ету көзделіп отыр. Ведомствоаралық комиссия құрылады», - дейді агенттік төрағасы.

Санэпид қадағалау тексерісін 3 есеге қысқарту ұсынылды, ал санитарлық-эпидемиологиялық қорытынды санын 4-тен 1-ге дейін қысқарту жоспарланған.

«Азық-түлік қауіпсіздігін қамтамасыз ету бойынша, ведомствоаралық комиссия құрып, камералық қадағалау жүргізу жоспарланған. Ол ақпараттық жүйені енгізу арқылы жүзеге асады», - деді ол.

Камила Амирова

Барлық жаңалықтар