ASTEX көрме-конференциясына 3300-ден астам адам қатысты

20 Мамыр, 2014 15:32

ASTEX көрме-конференциясына жарты күнде 3300-ден астам адам қатысты. Бұл туралы бүгін ҚР Президенті жанындағы Орталық коммуникациялар қызметінің брифингінде «Зерде» Ұлттық ақпараттық-коммуникациялық холдингі» АҚ басқарма төрағасы Бикеш Құрманғалиева мәлімдеді.

«Халықтың үлкен қызығушылық көрсетіп отырғаны анық. IT компаниялары мен кәсіпкерліктер біздің жұмысымызды жоғары бағалап, қоғамның қызығушылығын оятқанымызды айтып отыр. Көрме-конференцияға жарты күнде 3300-ден астам адам қатысты. Олардың барлығы өз еріктерімен тіркелгендер», - дейді Б.Құрманғалиева.

Оның айтуынша, 42 компания азаматтар үшін өздерінің электронды қызметтерін ұсынған.

«Шетелдегі сарапшыларымызды шақырттық. Екі күн ішінде конференцияға 41 спикер қатысты. Олардың барлығының баяндамаларын аудитория жылы қабылдап, көкейіндегі жүрген сауаладрын қоюдан да тартынған жоқ. Біз халықтың үдесінен шыға білдік», - дейді ол.

Естеріңізге сала кетейік, Astex XVII Астана экономикалық форумы аясында Қазақстанда екінші рет өткізіліп, тәжірибе алмасу алаңына айналып отыр.

Мадина Нұрбекова