Сенатта инновация мен ғылыми қамтымды экономика мәселелері талқыланды

17 Мамыр, 2014 13:04

Қазақстан Республикасы Парламенті Сенатының Төрағасы Қасым-Жомарт Тоқаевтың төрағалық етуімен «Өңір» тобының «Білім, ғылым және кәсіпкерліктің серіктестігі – ұлттық инновациялық жүйенің және ғылымға негізделген экономиканың стратегиялық даму жолы» тақырыбына арналған кеңейтілген отырысы болды.

«Ғылымға негізделген экономиканы құру үшін ең алдымен қазақстандық ғылымның әлеуетін ұлғайту қажет. Президенттің тапсырмасы бойынша ғылымды қаржыландыру ұлғаяды, ол нақты жаңалықтар мен инновацияларды, технологиялар трансферттері мен шетелдік инвестиялардың келуін ынтыландырады. Парламент венчурлік қаржыландыру, зияткерлік меншікті қорғау, зерттеулер мен инновацияларды қолдау, сондай-ақ ғылыми зерттеулерді коммерцияландыру жөніндегі заңнаманы жетілдіруге бағытталған заң жобалары топтамаларын қарауды жоспарлап отыр», - деді Қ.Тоқаев.

Отырыста ғылымды ұйымдастырудың жаңа түрі ретінде зерттеу университеттерін дамыту, мамандар даярлау және ғылыми нәтижелерді енгізуге ерекше назар аударылды, деп Сенаттың баспасөз қызметі хабарлады.

Сондай-ақ Сенат Төрағасы «Қазақстан-2050» Стратегиясында Мемлекет басшысы инновациялық дамудың жаңа стратегиясын ұсынғанын атап өтті. «Ол шетелдік технологиялар мен ұлттық ғылыми-техникалық ресурстарды оңтайлы үйлестіруді қамтамасыз етуге лайық қалыптастырылуы тиіс», - деді ол.

Отырысқа қатысушылар назарына «Назарбаев Университеті» АҚ-ның халықаралық деңгейдегі қазіргі заманғы зерттеу университетін құру жөніндегі тәжірибесі жария етілді. Қазіргі кезде бұл үлгі бойынша Қазақстанда басқа зерттеу университеттерін дамыту жоспарланып отыр.

Барлық жаңалықтар