КО елдерінің шекарасы үш елдің экономикасы үшін ашық– Т.Доскенов (Брифинг бейнебаяны)

«Бүгінде  ЕурАзЭО-ның көптеген жобалары – Еуразиялық даму банкі, Еуразиялық іскерлік кеңес, Еуразиялық медиа-форум, Еуразиялық университеттер қауымдастығы, Л.Н.Гумилев атындағы Еуразия ұлттық университеті жұмыс істеп тұр. Сонымен қатар, «еуразиялық интеграция» ұғымы брендке айналып, саясаткерлер, экономистер, журналистер мен қоғамдық ортада кеңінен қолданылуда», - дейді Т.Доскенов.

Оның айтуынша, қазіргі таңда Кедендік одақ елдері шекарасы үш ел экономикасы үшін барынша ашыла түсті.

«2009 жылдан бастап еліміздің Еуразиялық одақ аясындағы серiктестерімен тауар айналымы 88%-ға артып, ол 24 млрд долларға теңелдi. Өңделген тауарларды экспорттау екi есеге артты. Бiрiккен интеграцияның экономикадағы жиынтық көлемi 2,2 триллион долларға, ал шығарылған өнеркәсiптiк өнiмдер 1,5 трлн долларға тең. 2030 жылға қарай ЖIӨ жиынтығы 900 млрд долларға артуы мүмкiн», - деп қосты ол.

Сонымен қатар, ол Еуропадағы интеграциялық процестерді де тілге тиек етті. Оның айтуынша, Кедендік одақ көрсеткіштерді жақсарту жағынан оларға қарағанда анағұрлым қарқынды дамып келеді.

«Біз сіздермен бірге жаңа тарихи дәуірдің куәсі болып отырмыз. Еуропадағы интеграциялық процестің Кедендік одақ құруына 11 жыл керек болса, ортақ нарық құру үшін 34 жыл қажет болды, ал 40 жыл ішінде  Экономикалық қаржылық одақ құрылып отыр. Біздің интеграцияға қазіргі таңда 20 жыл», - дейді Т.Доскенов.

Мадина Нұрбекова