Астанада мейіргер қызметінің рөлі талқылануда

«Бүгінгі шараның басты мақсаты Қазақстан Республикасындағы мейіргерлік қызметтің күні тәртібіндегі мәселелерін талқылау болып табылады. Мейіргерлік қызмет бүгінгі таңда денсаулық сақтаудың негізгі саласының бірі екенін атқарылып жатқан шаралар дәлелдеп отыр. Бұл саланың мамандары базалық кәсіби-техникалық оқытудан өтіп, сонымен қатар бакалавриат, магистратура мен доктарантура деңгейлерін де алып жатыр. Денсаулық сақтау саласы ілгері кеткен дамыған мемлекеттерде жоғарғы білімді медбикелердің үлесі 50-60 пайызға дейін жетеді», - дейді ҚР ДСМ медициналық көмек ұйымы департаментінің директоры Ажар Төлеғалиева.  

Конференцияда Қазақстандағы  мейіргерлік қызметке арналған баяндамалар оқылып, Финляндия, Литвадан келген мамандар мен үкіметтік емес ұйымдардың, медбикелік қызмет саласындағы медициналық қауымдастық өкілдері сөз сөйлейді.

Қазіргі таңда Қазақстан үшін  МСАК жетілдіру денсаулық сақтау саласындағы басым бағыттардың бірі болып отыр.

Айта кету керек, конференция аясында республикада  мейіргерлік  қызмет мамандарына арналған жергілікті деңгейдегі кәсіби курстар, дөңгелек үстелдер, «2020 жылға дейінгі Қазақстан Республикасында мейіргерлік қызметті дамыту тұжырымдамасы» жобасын талқылау бойынша семинарлар, тренингтер және ауылдық жерлердегі денсаулық сақтау қызметкерлеріне арналған шеберлік сыныптары ұйымдастырылады.  

Конференция жұмысында Қазақстанда халықаралық деңгейдегі медбикелік қызметті дамыту бойынша қабылдануы қажет шараларға бастау болатын қарар қабылданады.

Естеріңізге сала кетейік, бүгінде елімізде 150 мыңнан астам орта деңгейдегі медициналық қызметкер жұмыс істеуде. Мамандарды дайындаумен 28 мемлекеттік және 40 жеке меншік медициналық оқу орындары айналысуда. 

Мадина Нұрбекова

Фото-Азамат Алиев