Жеңіс күніне орай Өскемен мен Барнауыл арасында телекөпір өтті

Кездесуге ШҚО мен Алтай өңірінің ардагерлері келді, деп  ШҚО Ақпарат орталығынан хабарлады.

Телекөпірдің «Ортақ соғыс-ортақ жеңіс» аталуы тегін емес. Телекөпірге қатысушылар фашизмге қарсы күресте түрлі ұлт өкілдерінің тізе қосып, иық тірісе күш біріктергенін айтты. Майдангер қариялар өмірінің ең ауыр кезеңі - сұрапыл соғыс жылдарын естеріне алды. Өрімдей жас шақтарында майданда қан кешіп, Ұлы Жеңіске жеткен шақтарын ой елегінен өткізді.

Кездесуде екі аймақтың басшылары барлық тұрғындар атынан ардагерлерге алғыс білдірді.

«Барлық ел-жұрт бірігіп, алдыға ортақ мақсат қоятын болса - жеңіске жетеді. Сіздер бүкіл әлемге патриотизмнің, Отанға деген сүйіспеншіліктің жарқын үлгісін таныттыңыздар. Біз, бүгінгі ұрпақ өкілдері Сіздерге тағзым етіп, алғыс білдіреміз»,-деді ШҚО әкімі Бердібек Сапарбаев.

Тарихта тұңғыш рет орын алып отырған екі аймақ арасындағы бұл  телекөпір, көршілес екі мемлекет пен тағдырлас халықтардың тарихи және рухани байланысының мызғымастығының бір дәлелі болды.