Бірлік, ынтымақтық, бейбітшілік пен келісім Қазақстанның барлық жетістіктеріне арқау болып келеді- А.Есімов (ФОТО)

2 Мамыр, 2014 11:26

Қазақстан этносаралық келісімнің теңдессіз моделін әлемдік қауымдастыққа үлгі етіп отыр. Бұл туралы Қазақстан халқының бірлігі күніне арналған мерекелік шара барысында Алматы қаласының әкімі Ахметжан Есімов айтты.

«Бұл күн еліміздегі ең маңызды әрі мәнді күндерінің бірі болып бекітілген. Шаттық пен қуанышқа, ізгілік пен игілікке толы шоқтығы биік мереке бірлік пен татулықты, бейбітшілік пен бірлікті кейіптейді. Дәл осы мәңгілік құндылықтар еліміздің барлық жетістіктеріне арқау болып келеді. Алматы – тәуелсіз Қазақстанның алғашқы астанасы, қоғамдық-саяси, қаржы-экономикалық, мәдени орталығы, спорт және білім ошағы болып қала береді», - деді Ахметжан Есімов.

Абай алаңында этно-қалашық бой көтеріп, этно-көрме ұсынылды. Әр этно-мәдени бірлестік арнайы тігілген шатырда өз этносының тарихы мен мәдениетін, дәстүрі мен ұлттық тағамдарын таныстырды.

Қала әкімдігінің мәліметінше, Қазақстан Халқы Ассамблеясының құрамына Алматы қаласының 34 этномәдени бірлестігі кіреді. Этномәдени бірлестіктердің жанындағы жексенбілік мектептердің жұмыстарына, олардың өз тілдерін дамытуға қала бюджетінен қаржылай қолдау қарастырылған. Мұның бәрі қаламыздағы қолайлы этносаралық ахуал мен кең мүмкіндіктерді көрсетеді.

Барлық жаңалықтар