Жамбыл облысында 22 денсаулық сақтау нысаны пайдалануға беріледі

Қалған үш нысанның құрылысы келер жылы аяқталады. Жобалардың жалпы құны 4,6 миллиард теңгені құрайды, деп хабарлайды облыс әкімдігі.

Атап айтар болсақ, «100 мектеп, 100 аурухана» жобасы аясында Тараз қаласында жалпы құны 2,6 млрд теңге болатын 300 орындық қалалық көпсалалы аурухана ашылады.

Сонымен қатар, «350 дәрігерлік амбулатория, фельдшерлік-акушерлік пунктер мен ауруханалар құрылысы» жобасы аясында облыста 5 медициналық мекеме пайдалануға беріледі. Бұлар – Сарысу ауданындағы тәулігіне 20 кісіне қабылдайтын фельдшерлік-акушерлік пункт, Жуалы ауданындағы тәулігіне 25 адамды қабылдайтын дәрігерлік амбулатория, Қордай ауданындағы тәулігіне 30 адамды қабылдайтын фельдшерлік-акушерлік пункт пен 20 адамдық медициналық пункт, сонымен қатар Меркі ауданынағы 30 адамдық дәрігерлік амбулатория. Бұл жобалардың жалпы құны шамамен 486 млн теңге.

Бұдан бөлек жоғарыда айтылған жобалардан бөлек тағы 16 денсаулық сақтау нысаны салынады. Олардың жалпы құны 630 млн теңге.

Жалпы, егер өткен жылы өңірде 20 денсаулық сақтау нысаны салынса, 2009-2012 жылдары аралығында 44 денсаулық сақтау мекемелері салынған.