Алматы облысының ШОБ өкілдері Мемлекет басшысына бизнеске қолдау көрсеткені үшін алғыс білдірді

Ақордада хабарлағандай, өз хаттарында кәсіпкерлер Мемлекет басшысына «Қазақстан Республикасында кәсіпкерлік қызмет үшін жағдайды жақсарту жөніндегі түбегейлі шаралар туралы» Жарлыққа қол қойғаны, оған сәйкес 2014 жылғы 2 сәуірден 2015 жылғы 1 қаңтарға дейін шағын және орта бизнес субъектілеріне тексеріс жүргізуге мораторий жарияланғаны үшін алғыстарын білдірген.

Кәсіпкерлер Палатасының Сарқанд ауданы бойынша филиалының директоры Ф.Абдрахимов жоспарлы тексеріс тәжірибесі алынып тасталғаны және бизнесті жүргізуге жасалған нақты көмек үшін ризашылығын білдіреді.

Кәсіпкер С.Махаметова бизнеске көрсетілген қамқорлық үшін алғыс айтады.

«Бұл – бар күш-жігеріңді толығымен бизнесті дамытуға жұмсайтын кезең, өйткені тексеріс кезінде талап етілетіндей көптеген қажетті құжаттарды жинақтауға уақытымыз кетпейді», – деп жазады автор.  

Өз кезегінде Қ.Шеңгелбаев Мемлекет басшысының Жарлығы отандық бизнестің ішкі және сыртқы экономикалық бәсекеге қабілеттілігін арттыруға септігін тигізетінін атап өткен.

Сондай-ақ, өздері жолдаған хатта шағын және орта бизнес үшін жағдайдың ұдайы жақсарып келе жатқанына облыс кәсіпкерлері Ж.Кабиев, С.Базарбаев, Е.Нұрдәулетов, С.Қалиева, А.Кеңес, А.Байболова, М.Ескендірова, Ә.Дайырбекова алғыстарын айтқан.