«Самұрық-Қазына» АҚ «Ардагерлер ұйымы» РҚБ-мен әріптестік туралы меморандумға қол қойды

Кездесу барысында қор өкілдері ардагерлердің бүгінгі мәселелерін талқылап, әріптестік туралы меморандумға қол қойды.

«Меморандумның түзілуі Ұлы Отан соғысының жеңісінің 70 жылдығын тойлау дайындығына серпін бермек. Біздің акционерлік қоғам аталмыш мерейтойдың ұйымдастырылуына өзіндік үлесін қосуға ниетті. Жалпы, біз бұрыннан бері ардагерлер кеңесімен ортақ жұмыс істеп, осындай құжаттарға қол қоюды жоспарлап жүрген едік», - дейді «Самұрық-Қазына» АҚ жұртшылықпен байланыс департаментінің бас директоры Дархан Қалетаев.

Өз кезегінде Орталық ардагерлер кеңесінің төрағасы Өмірзақ Озғанбаев қор өкілдеріне алғысын білдірді.

«Ардагерлер біздің Отанымыздың тірегі. Біз бүгінгі күніміз үшін олардың алдында қарыздармыз. Қазақстанның бүгінгі таңдағы әлемдік беделі де солардың арқасы. Біз бүгін осы құжатқа қол қоя отырып оны болашақта іске асыратын боламыз», - дейді.

Сонымен қатар, кездесуде Қазақстан Респубикасында Ұлы Отан Соғысы Жеңісінің 70 жылдығына дайындалу мен өткізу мәселелері сөз болды.

Айта кету керек, «Ардагерлер ұйымы» РҚБ еліміздегі ең ірі бірлестіктердің бірі болып табылады. Оның құрамында шамамен 1,7 млн адам бар. Атап айтар болсақ, соның 6346-сы Ұлы Отан соғысы ардагерлері, 203270 тыл ардагерлері, 744 концлагерь тұтқындары мен өзгелер бар.