• Басты
  • Біз ұлтаралық келісімді сақтай алдық – Д.Абдуллаев

Біз ұлтаралық келісімді сақтай алдық – Д.Абдуллаев

9 Сәуір, 2014 16:50
Бүгін ҚР Президенті жанындағы Орталық коммуникациялар қызметінің брифингінде Жамбыл облыстық Қазақстан халқы Ассамблеясының мүшесі, «Ахыска» облыстық түрік этномәдени бірлестігінің құрметті төрағасы Дүниядар Абдуллаев ҚХА-ның қоғамдағы рөлі туралы айтты.

«Егер қандай да бір деңгейде ұлтаралық келіспеушілік туындайтын болса, оның зардабын атом бомбасымен салыстырсақ асыра сілтегендік емес. Ол қоғамды баяу және түбегейлі құртып тынады. Ешбір жерде ұлтаралық қақтығыс тез шешімін таппақ емес. Ал біз ұлтаралық келісімнің салтанат құруына жағдай жасай алдық. Біз Президенттің бастауымен ірі жұмыстарды атқарудамыз. Ондағы мақсат аталмыш құндылықтың елімізде мәңгілік орнығуы. Бұл біздің жетістік пен мақтанышымыз. Осы бетімізден таймай, Отанымыздың тыныштығына қызмет етуіміз керек», - дейді Д.Абдуллаев.

Оның айтуынша, қазіргі таңда Жамбыл облысында 87 ұлт өкілдері өмір сүруде. ҚХА өңірлік өкілдігі ретінде 24 облыстық және 47 аудандық этномәдени бірлестік жұмыс істеп тұр. Облыс тұрғындарының 90 пайызы қазақ тілінде сөйлейді. Облыс аудандарында қоғамдық келісім кеңестері құрылған. Онда 2020 жылға дейінгі ҚХА Тұжырымдамасын аудандық деңгейде іске асыру қарастырылған. Облыс ассамблеясы жанында ғылыми-сараптамалық топ жұмыс істейді.  

«Көпколоритті Қазақстанның шаңырағының астында 130-дан астам ұлт өкілдері тату-тәтті өмір сүруде. Олар өзара түсіністігінің арқасында бейбітшілік пен келісімнің салтанат құруына ұйытқы болуда», - дейді Жамбыл облыстық ҚХА өкілі.

Барлық жаңалықтар