2014 жылдың сәуір айында 2017 жылғы Универсиаданың 3 ірі жобасының құрылысы басталады
3 Сәуір, 2014 18:30
2014 жылдың сәуір айында Алматыда екі спорттық нысан мен Олимпиада қалашығының құрылысы басталады. Бұл туралы ҚР Президенті жанындағы Орталық коммуникациялар қызметінің брифингінде ҚР Студенттік спорттың ұлттық федерациясы президенті Қайрат Закарьянов мәлімдеді.
«2017 жылғы Универсиадаға дейін Алматыда екі ірі спорттық нысан іске қосылады. Бірі 12 мың орындық болса, екіншісі 3 мың орындық. Сонымен қатар, Универсиадаға қатысуға келетін спортшылардың орналасатын Олимпиада қалашығы салынады», - дейді Қ.Закарьянов.
Оның айтуынша, Универсиаданы өткізгеннен кейін бұл қалашық Алматы қаласы студенттерінің игілігіне беріледі.
Аталмыш жобалар мақұлданған, енді олардың құрылыс жұмыстары биылғы жылдың сәуір айында басталады.
«Осы жобалардыың барлығы мақұлданып, қаражаты бөлінген. Алматы қаласы әкімі Ахметжан Есімовтың FISU президентімен кездесуіндегі айтуынша, аталмыш нысандардың құрылыс жұмыстары басталады», - дейді.
