Көкпекті ауылындағы ТЖ-ны жою үшін 900 адам жұмылдырылды

Жергілікті атқарушы органдар мен ТЖМ күштері су басқан үйлердің жертөлелері мен аулаларынан суды айдау, аумақтарды тазалау жұмыстарын жүргізуде. 102 үй судан тазартылды, 40 үй мен аула тазаланды, деп ТЖМ-де хабарлады.

ТЖМ Медициналық апат және психологиялық қызмет басқармасының, психологиялық қызмет бөлімінің қызметкерлері зардап шеккен тұрғындарға шұғыл психологиялық көмек көрсетуде.

Үш телефон нөмірі бойынша «жедел байланыс» және түнгі мезгілде дербес жарық беру ұйымдастырылып отыр. Қоғамдық тамақтандыру орындарындағы тамақтың сапасы тұрақты тексерілуде. Қоқыс-қалдықтардың арнайы жерлерге шығарылуы да бақылауға алынып отыр.

Ветеринарлық жасақ қырылып қалған үй малдарының өлекселерін Петровка селосында орналасқан биотермикалық шұңқырға шығаруды ұйымдастыруда. Соңғы мәліметтер бойынша, апат салдарынан 485 малдың қырылғаны анықталып отыр.

Арнайы комиссия келген материалдық шығынның сомаларын анықтауда. Атап айтқанда, қалпына келтіруге жатпайтын үйлер мен жөндеу жұмыстарын жүргізуді қажет ететін үйлер, тұрмыстық техникалар мен жиһаздар, басқа да үй тұрмысындағы заттар анықталуда.