Қазақстан мен Қытай Қорғаныс министрлері екіжақты ынтымақтастықты талқылады
1 Сәуір, 2014 12:30
Тәжікстанда Шанхай Ынтымақтастық ұйымына мүше мемлекеттер Қорғаныс министрлері Кеңесі шеңберінде Қазақстан қорғаныс ведомствосының басшысы Әділбек Жақсыбеков Қытай Халық Республикасының Қорғаныс министрі генерал-полковник Чан Ваньцюанмен кездесті.
ҚР Қорғаныс министрлігінде хабарлағандай, кездесу барысында тараптар қазақ-қытай әскери және әскери-техникалық ынтымақтастығының қазіргі жағдайы мен перспективаларын талқылады.
Қытай Қорғаныс министрлігі ағымдағы жылы Қазақстанда өтетін екі үлкен іс-шара «Алтын үкі» мергендер жұбы жарысы мен «KADEX-2014» үшінші халықаралық көрмесіне қатысатынын растады.
Әділбек Жақсыбеков пен Чан Ваньцюань тату көршілік және достық қарым-қатынастық негізде құрылған Қазақстан-Қытай өзара тиімді ынтымақтастығының жемісті дамуына сенім білдірді.
