ЭКСПО-2017 кезінде шамамен 20 мыңдай жаңа жұмыс орны ашылмақ–Т.Ермегияев
31 Наурыз, 2014 14:25
Астанада ЭКСПО-2017 кезінде құрылыс саласында шамамен 20 мыңдай жаңа жұмыс орнын ашылады, деп мәлімдеді бүгін ҚР Президенті жанындағы Орталық коммуникациялар қызметінің брифингінде «Астана ЭКСПО-2017» Ұлттық компаниясы» АҚ басқарма төрағасы Талғат Ермегияев.
«Менің ойымша, көрменің экономикалық тиімділігі ұшан-теңіз. Бұл шағын және орта кәсіпкерлік пен қызмет көрсету саласына серпін бермек. Мысалға, құрылыс саласы бойынша көрмеге дейін, көрме уақытында және одан кейін 20 мыңдай жаңа жұмыс орны ашылады», - дейді Т.Ермегияев.
Сонымен қатар, оның айтуынша, Ұлттық компаниярның міндеттемесі – Астанадағы ЭКСПО-2017 халықаралық көрмесінің ауқымын кеңейту.
«Көрменің құнына келер болсақ, ол техникалық-экономикалық негіздеме жұмыстарынан кейін анықталады. Біз оны бітіріп қалдық. Менің ойымша, екі апта ішінде біз техникалық-экономикалық негіздеменің сараптамасын аламыз. Онда осы жобаның шамамен құнына тең келетін цифрлар көрсетіледі», - дейді басқарма төрағасы.
