Ұлттық банк «Бразилиядағы FIFA 2014 футболдан әлем чемпионаты» естелік монетасын шығарды

Ұлттық банктен хабарлағандай, монета 925 сынамадағы күмістен жасалған, оның салмағы - 24 грамм, диаметрі - 37 мм,  дайындалу сапасы - «proof», тиражы - 6 мың дана.

Монетаның бет жағында (аверсінде) төменгі бөлігінде стадионның стильдендірілген бейнесінің ішінде Қазақстан Республикасының елтаңбасы, монета дайындалған металды, оның сынамын және массасын білдіретін «Ag 925 24 g» деген жазу және соғылған жылын білдіретін «2014» деген сан бейнеленген. Сол жағында екі жолға орналастырылған және монетаның номиналын білдіретін «100 ТЕNGЕ» деген жазу бар. Жоғарғы бөлігінде Қазақстан Республикасы Ұлттық Банкінің логотипі орналасқан. Айналдыра мемлекеттік тілде «ҚАЗАҚСТАН ҰЛТТЫҚ БАНКІ» деген жазу бар.

Монетаның сырт жағында (реверсінде) орталық бөлігінде стильдендірілген стадион аясында ойын кезіндегі спортшылар бейнеленген. Айналдыра ағылшын тілінде «2014 FIFA WORLD CUP BRAZII™» деген жазу бар.