Қазақстан Мәскеудегі көрмеде елдің туристік мүмкіндіктерін таныстыруда

Қазақстандық стендтің ұйымдастырушысы ретінде ҚР Индустрия және жаңа технологиялар министрлігінің Туризм индустриясы комитеті қатысуда. Қазақстандық стенд киіз үй түрінде бейнеленген, деп хабарлайды ведомства.

Көрмеде қазақстандық стендті Дүниежүзілік туристік ұйымның (ЮНВТО) Бас хатшысы Талеб Рифаи тамашалап, өңірдегі туризм саласының дамуындағы оң жетістіктердің байқалатынын айта келіп, «Ұлы Жібек жолы» секілді туристік өнімін өңірде барынша кеңінен тарату керектігін тілге тиек етті. Дүниежүзілік туристік ұйым Бас хатшысының айтуынша, 2013 жылы әлемдік туристік ағым миллиардтаған планкадан асқан. Туристік мақсатпен 1 млрд. 87 млн. адам шекара асқан. Биыл аталмыш туристік ағым тағы 4,5-5% көбейеді деген болжам бар.

ҚР ИЖТМ Туризм индустриясы комитеті төрағасы Марат Иғалиевтің мәліметінше, биыл көрмедегі қазақстандық стендте тек өңірлердің туристік әкімдіктері ғана емес, сонымен қатар көптеген туристік компаниялар қатысуда.

Жоспар бойынша Қазақстан Астана мен Алматы қалаларында және Алматы мен Маңғыстау облыстарында ЭКСПО-2017 көрмесінің арнайы тұсаукесерін ұйымдастырып, елдің туристік мүмкіндіктерін жаһандық деңгейде таныстыруды жоспарлауда.

Айта кету керек, биыл көрмеге әлемнің 148 елі мен өңірлері қатысуда. Ал шараға қатысуға 1500 шамасында компания өтініш берген. Ұйымдастырушылардың болжамынша, көрмеге 80 мыңдай адам келмек. Көрме бірінші кезекте кәсіби аудиторияға арналған. Көрме аясында қазақстандық делегация конференцияларға, семинарларға, шеберлік сыныптары, дөңгелек үстелдер мен тұсаукесер рәсімдеріне қатыспақ.