2014 жылдың басынан бері Қостанай облысында 240-тан астам мүгедек жұмысқа тұрды
Жыл басынан бергі алғашқы мүмкіндігі шектеулі жандардың бос жұмыс орны жәрмеңке барысында өңір кәсіпкерлерінен 40-тан астам мүгедек жұмысқа орналасу туралы ұсыныс алды. ҚР ұлттық кәсіпкерлер палатасының хабарлауынша, шараның ұйымдастырушыларының бірі Қостанай облыстық кәсіпкерлер палатасы.
«Бүгін біз мылқау әріптесімізбен сөйлестік, оның аты Сергей. Мамандығы дәнекерлеуші. Оның айтуынша бұл кәсіпті ол әкесінен үйренген. Айналасындағылар Сергейдің өз ісінің шебері екенін айтады. Біздің ұжымға жақсы дәнекерлеушілер керек. Сонымен қатар біз бұл жерден өзімізге екі күзетшіні де тауып қойдық, енді жұмысқа аламыз», - дейді «Титан» ЖЭК кадр бөлімінің бастығы Елена Жихарева.
Шараға бас-аяғы 70 шақты жұмыс беруші мен 100-ден астам мүмкіндігі шектеулі жан қатысты. Кәсіпкерлер палатасы сарапшылары мен «Нұр Отан» партиясы бөлімшесі өкілдері және Жұмыспен қамту басқармасы мамандарының біріккен жұмысының арқасында үміткерлер кәсіпкерлермен бетпе-бет сөйлесіп, жұмысқа тұру жағын қарастыруға мүмкіндік алды.
«Біз кәсіпкерлер арасында белсенді қызмет етеміз. Кәсіпкерлердің қайсысында мүмкіндігі шектеулі жандарға бос жұмыс орындары бар екенін анықтаймыз. Және де мүгедектерді де жұмысқа алудң маңызын түсіндіреміз. Нәтижесінде мүмкіндігі шектеулі жандарды жұмысқа алуға тартынбайтындар бүгінде осы шараға келіп отыр», - дейді ӨКП директорының орынбасары Манарбек Қазин.
Жұмыспен қамту және әлеуметтік бағдарламалар басқармасының хабарлауынша, мүгедектердің көпшілігі «Жұмыспен қамту-2020» бағдарламасы аясында тегін оқытудан өткізіледі.
