Қазақстанда ЭКСПО өткізу кезінде 40 мемлекетке визасыз режим енгізілмек - Р.Жошыбаев

14 Наурыз, 2014 13:35

Сыртқы істер министрлігінің жауапты хатшысы Рапиль Жошыбаев ҚР Президенті жанындағы ОКҚ өткен брифингте ведомствоның жақын арада енгізілетін визасыз жүйесі туралы айтып берді.

«Жақын арада біз әлемнің дамыған 10 еліне визасыз жүйені енгізуге дайындалудамыз. Содан кейін жазғы 5 айлық уақытқа 40-қа жуық мемлекетке визасыз жүйені енгізбекшіміз. Олар дамыған елдер, Еуропалық және Ортаазиялық аймақтардағы, сонымен қатар өзге де аймақтардағы біздің серіктестеріміз, яғни ол жақтан көптеп туристер тартуға мүмкіндік бар», - деді Р. Жошыбаев.

Оның айтуынша, қазіргі таңда өзге мемлекеттерден топтық туризм бойынша жеңілдетілген визалық жүйені енгізу мүмкіншіліктері қарастырылуда.

«Бүгінде 2020 жылға дейін туризмді дамыту бойынша қабылданған бағдарлама бар, оның шеңберінде біздің елімізді көргісі келетіндерге жеңілдетілген топтық визаны беру мәселесін қарастырудамыз», - деді ол.

Сонымен қатар, ол ЭКСПО-2017 дайындық барысында инфрақұрылымдардың дамуы жайында айтып берді.

«Біз ЭКСПО Қазақстанда туризм саласын дамыту бойынша қозғаушы локомотив болатынына сенімдіміз. Сонымен қатар, ол қонақ үй, мейрамхана және басқаларға қатысты мәселелерді көтеріп талқылайтын алаң болады деп ойлаймыз», - деді сөз соңында Р. Жошыбаев.

Барлық жаңалықтар