«Мәңгілік Ел» идеясы қазақ халқының мыңдаған жылдық тарихынан туған – С.Салмурзин

«Ұлт Көшбасшысы өзінің Қазақстан халқына арнаған «Қазақстан жолы-2050»: Бір мақсат, бір мүдде, бір болашақ» Жолдауында қазақ халқының мыңдаған жылдық тарихынан, еліміздің даму жолымыз бен тәуелсіздік жолындағы арманымыздан туған «Мәңгілік Ел» идеясын көтерді. Бұл туралы біздің ата-бабамыз арман етіп, халқымыздың барлық құндылықтары мен бірлігін сақтауда ерлік таныта білді», - дейді С.Салмурзин.

Оның айтуынша, «баяғы бабаларымыздың ғасырлар бойғы арманы бүгін тәуелсіз Қазақстан Республикасы түрінде көрініс тауып, көптеген ұлт пен ұлыс өкілдерінің бастарын қосатын ортақ тағдыр жасаған ортақ үйімізге айналып отыр».

«Бүгінде біздің еліміз оң өзгерістерге қарай қарыштап дамып келеді. Атап айтар болсақ барлық әлемдік және дәстүрлі діндер көшбасшыларының басын біріктіріп диалог құрып, интеграциялық бастамаларды қолға алып, бейбітшілік жолында ядролық қарудан да бас тартып отыр. Бұның барлығы қоғамдағы ауызбіршілік пен ұлттық бірліктің арқасында орындалып, Ұлт Көшбасшысы, Тұңғыш Президентіміз Нұрсұлтан Әбішұлы Назарбаевтың ерен еңбегінің арқасында мүмкін болып отыр», - дейді С.Салмурзин.